Быйыл Бырабыыталыстыба отчуота өрөспүүбүлүкэ бары нэһилиэктэрин хабан, миэстэлэригэр ыытыллаллар. Үгэс быһыытынан олунньу маҥнайгы күннэриттэн саҕаланнылар. Ол курдук, олунньу 14 күнүгэр биһиги нэһилиэкпитигэр Нөөрүктээйигэ Бырабыыталастыба иккис отчуоттуур бөлөҕө олохтоохтору кытта көрүстэ.
Отчуоттуур бөлөххө Саха Өрөспүүбүлүкэтин тыатын хаһаайыстыбатын миниистирин солбуйааччыта Николай Степанович Афанасьев, доруобуйа харыстабылын миниистирин солбуйааччыта Надежда Тимофеевна Федорова, Саха Өрөспүүбүлүкэтин бырабыыталыстыбатын араас хайысхаларын үлэһиттэрэ нэһилиэкпит олохтоохторун кытта көрсөн мунньахтаатылар. Улууспут баһылыгын бастакы солбуйааччыта Василий Васильевич Михайлов, улууспут депутаттарын сэбиэтин бэрэссэдээтэлэ Иннокентий Иннокентьевич Андросов, уонна да атын управлениялар салайаачылара кыттыннылар. Ситэриилээх былаас ааспыт сыллааҕы үлэтин уонна ситиһиилэри сырдатта, үүммүт сылга соруктары билиһиннэрдэ.
Бастатан туран, нэһилиэкпит сайдарын, тупсарын туһугар туох үлэ барбытын билиһиннэрдилэр. Салҕыы олохтоохтору кытта ыкса үлэлэстилэр. Нэһилиэнньэ олохтоохторо сүрүннүүр боппуруостарын ыйытан ол тула кэпсэтиини ыыттылар. Ол курдук, хаарбах дьиэттэн көһөрүү бырагыраама салгыы үлэтин туһунан. Эдэр үлэһиттэргэ аналлаах саҥа уопсай дьиэ тутуутугар ханнык көмө баарын ыйыталастылар. Бэйдиэ сылдьар ыттар олохтоох дьоҥҥо, оҕолорго кутталы үөскэтэрин инниттэн бэйдиэ ыттары бэрээдэктээһин миэрэтигэр туох үлэ ыытылларын, Ходороҕо тутуллубут приют үлэтин сурастылар. Тулаайах оҕолорго дьиэ бэриллиитин уочарытын ыйыталастылар.
Салҕыы Нөөрүктээйибит нэһилиэгин дьоно көрдөрөн эмтэнэр саҥа балыыһатын уонна оҕо уһуйаанын тутуутун тула кэпсэтиини ыыттылар. Оскуолабыт өрөгөйдөөх 150 сыллаах үбүлүөйүн бэлиэтиир таһымнаах тэрээһини ыытарга Барыбыыталыстыба хамыыһыйатын үлэтин тэрийиитин тула кэпсэтиини тэрийдилэр. «Төҥүргэстээх» диэн сайылыкка уот линиятын киллэриитин, бэтэринээриийэҕэ эдэр үлэһиттэр үлэлии кэлэллэригэр хамнаһы үрдэтиини туоруорустулар. Ону тэҥэ атын тыын буолар кыһалҕаларын эттилэр, ыйыттылар. Мунньахха олохтоохтортон 105 киһи кыттыыны ылла.
Түмүккэ мунньахха киирбит этиилэр бары боротокуолга киирэн, салгыы үлэҕэ ылыллалларын туһунан иһитиннэрдилэр.
В.Н.Оконешников аатынан Павловскай орто оскуолатын медиа-киинэ