Биһиги, саха норуота бэйэбитин кытта илдьэ сылдьар төрүт үгэстээхпит, айыыларга сүгүрүйэбит. Оскуолабыт 110 сыллаах үбүлүөйүн чэрчитинэн ыытылла турар мас тардыһыытын өрөспүүблүкэтээҕи күрэхтэһиитигэр кыттар оҕолор саха төрүт үгэһин илдьэ сылдьалларын бэлиэтии көрдүм.
Биһиги ыраах айаҥҥа турунаары туран, быһаарыылаах түгэҥҥэ, үөрүүбүтүн-көтүүбүтүн, ситиһиибитин кытта тэҥҥэ алаадьыбытын илдьэ сылдьан, сирбитин-уоппутун аһатабыт.
Күрэхтэһиигэ кытта кэлбит үгүс оҕо оскуолабыт муннук, чуумпу сирдэригэр уонна күрэхтэһии ыытыллар киин трибунатын анныгар алаадьы уурбуттар.
Бу – спортсмен оҕолор Халыҥ Хадаар ытык сиригэр сүгүрүйүүлэрин, бу түһүлгэ кинилэр олохторугар хайдах курдук улахан суолталааҕын, оҕолор саха төрүт үгэһин ытыктаан илдьэ сылдьалларын бэлиэтэ диэн сыаналаатым.
«Хадаар түһүлгэтэ» ситиһиилээх буоллун. Биһиги Хадаарбытын ытыктаан, алгыстаах алаадьыгытын утары ууммуккутугар махтанабын.
Айна БАНДЕРОВА, VII кылаас,
С.Д Флегонтова аатынан Хадаар орто оскуолата, Чурапчы