Эбээн-Бытантай национальнай улууһугар Саха Өрөспүүбүлүкэтин ситэриилээх былааһын 2024 сыллааҕы отчуота оройуон кииниттэн 100 км тэйиччи сытар Кустуур нэһилиэгиттэн саҕаланна.
Олунньу 11 күнүгэр СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников салайааччылаах оробуочай бөлөх нэһилиэнньэни кытары көрсүһүүнү оскуолаттан, саҥа үлэҕэ киирбит хочуолунайтан саҕалаата.
Билэрбит курдук, 2021 с. Кустуур орто оскуолатын дьиэтэ баһаарга былдьаммыта. Төрдүс сылын икки сиринэн тарҕаһан эргэ дьиэҕэ үөрэнэбит. Оскуола оҕотун ахсаана 91. Онон Кустуур олохтоохторун, кыратыттан кырдьаҕаһыгар диэри туруорсар боппуруостара саҥа оскуола тутуллуута. Билиҥҥитэ саҥа оскуола тутуллуута өрөспүүбүлүкэҕэ иккис уочаракка турар. Манна үбүлээһин өттүгэр эмиэ кэккэ уларыйыылар киирбиттэрин иһитиннэрдилэр. Олохтоох дьаһалта өттүттэн проектнай-сметнай докумуону бэлэмнэнэр.
Үөрэх уонна наука миниистирин бастакы солбуйааччыта Михаил Присяжнай 10 кылаас үөрэнээччилэрин кытары көрүстэ. Оҕолор тохсус кылаас кэнниттэн оскуолаҕа салгыы үөрэнэ хаалалларын уонна былырыыҥҥы выпускниктар 100% үөрэххэ киириилэрин бэлиэтээтэ. Маны таһынан Кустуур агро хайысхалаах оскуолатыгар үлэ лааҕыра үчүгэй баазалааҕын бэлиэтээн этэн аһарда.
СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников Саха сирин түөрт улууһугар отчуоттуохтаах. Үлэтэ Эбээн-Бытантай улууһуттан саҕаламмытын эттэ. Кини биһиги улууспутугар иккис сырыыта эбит. Бастакы сырыыта Дьарҕаалаахха саҥа хочуолунай арыллыытыгар кэлэ сылдьыбытын кэпсээтэ.
— Нэһилиэнньэ сүрүн туруорсар боппуруостара, биллэн турар, саҥа оскуола тутуллуута. Маны тэҥэ тыа хаһаайыстыбатын боппуруоһугар саҥа хотон тутуута, өртөөһүн, олох-дьаһах өттүгэр — саҥа хочуолунай үлэҕэ киириитэ буолар. Нэһилиэнньэ олус көхтөөх эбит. Ситэриилээх былаас отчуотун «үчүгэйинэн» сыаналаатылар, — диэн кини иһитиннэрдэ.
Биһиги Кустуурбут нэһилиэгэ улуус кииниттэн 100 км ыраах сытар. Кыһыҥҥы суолу-ииһи олохтоохтор эмиэ туруорустулар.
Анатолий Потапов, СӨ транспорт уонна суол-иис хаһаайыстыбатын миниистирин бастакы солбуйааччыта:
— Оройуоҥҥа Саккырыыр-Кустуур, Саккырыыр-Дьарҕаалаах хайысхаларынан икки муниципальнай суол баар. Сахабыт сиригэр «Арктика суола» диэн казеннай тэрилтэ 2014 c. үлэлиир. Тэрилтэ 9 учаастактаах уонна биир прорабскай учаастактаах. Ол иһигэр Эбээн-Бытантай улууһугар биир подразделениебыт баар. Кини 17 үлэһиттээх, 9 техникалаах. Ону учуоттааммыт, муниципальнай оройуон, нэһилиэнньэ быһаччы туруорсуутунан, Кустуур уонна Дьарҕалаах хайысхаларын өрөспүүбүлүкэ суолугар киллэрэргэ билигин быһаарыныыны ылыныахпыт уонна быйылгы сылтан аныгыс автозимникка диэри өрөспүүбүлүкэ бюджетыттан үбүлүүр буолуохпут.
Саха Өрөспүүбүлүкэтин ситэриилээх былааһын 2024 сыллааҕы отчуотун Кустуур олохтоохторо иһиттилэр уонна «үчүгэй» сыананы туруордулар.
Саҥа оскуола тутуллуутун Кустуур нэһилиэгин оҕолоро күүтэ-эрэнэ хаалабыт.
Владимир Попов, 9 кыл. үөрэнээччитэ.
Оператор: Тапталыына Рожина, 9 кыл. уонна Дмитрий Степанов, 11 кыл.
Хаартыскалар: Альбина Другина уонна Наум Наумов, 10 кыл.
«Биракчаан» медиакиин, И.Н. Слепцов аатынан Кустуур орто оскуолата,
Эбээн-Бытантай улууһа.
keskil14.ru