Сайдыы дьоло түстэнэр
Сырдатар-иһитиннэрэр эйгэ үлэтэ оҕо олоҕу ылынарыгар, олоххо бэйэтин миэстэтин булунарыгар элбэх өҥөлөөх. Төрөппүттэртэн, учууталлартан, үөрэх кинигэлэриттэн ылар билиини таһынан оҕоҕо сырдатар-иһитиннэрэр эйгэ нөҥүө кэлэр сонун быдан дөбөҥнүк тиийэр.
1997 сылтан Хаптаҕай нэһилиэгин баһылыга Василий Прокопьевич Соломонов көҕүлээһининэн тэриллибит “Кустук” олохтоох тэлэбиидэнньэ дьону сынньатар-аралдьытар, саҥаны-сонуну биллэрэр, иитэр-үөрэтэр сыаллаах. Ол ирдэбили тутуһан күн бүгүҥҥэ диэри Хаптаҕай орто оскуолатын иһинэн тэтимнээхтик үлэлиир.
Бастакы сылларга телестудияны кулууп үлэһиттэрэ иилээн-саҕалаан үлэлэппиттэрэ. Кэлин ону оскуолаҕа туттарбыттара. Онтон ыла О.П. Заровняева салалтатынан оскуола, нэһилиэк олоҕун сырдатыыга ылсыбыттара. Операторынан Афанасий Иванович Назаров үлэлээбитэ.
«Кустук» – оскуолаҕа
2003 сылтан “Кустук” телестудияны физика учуутала Нина Николаевна Яковлева салайар. Көмпүүтэргэ хас биирдии устууну таҥааччынан информатика учуутала Юристан Валерьевич Шарин сүрдээх таһаарыылаахтык, II-XI кылаас оҕолорун хабан туран, үлэлии-хамсыы сылдьаллар.
«Кустук» студия сахалыы уонна нууччалыы тылынан тахсар. Иһитиннэрэр, аналитическай, публицистическай, сэргэхситэр, үөрэтэр, спортивнай, култуураны сырдатар уонна оҕоҕо аналлаах биэриилэри оҥорор. Араас хайысханы таарыйар рубрикалардаах. Оттон «Сылаастык утуйуҥ, кырачааннар», «Сатабыл», «Минньигэстик аһааҥ», «Сонуннар», «Кэл, олор, сэһэргэһиэх», «Дьыллар уонна дьоннор», о.д.а. биэриилэрэ олус сэргэхтэр.
Быйыл 20 сылын туолар телестудияҕа 26 оҕо дьарыктанар. Аныгы оҕо, ханнык да үөрэххэ киирбитин иһин, чобуо тыллаах-өстөөх, булугас өйдөөх, үгүс сатабыллаах буолуохтаах.
Ситиһии
Бүтүн Россиятааҕы “Таланты России” күрэххэ “Кирдээх харчы” киинэлэринэн лауреат (2014); Бүтүн Россиятааҕы “Салют, победа!” күрэххэ “Ким да умнуллубат, туох да умнуллубат!” документальнай киинэлэринэн дипломант (2015); телестудиябыт иитиллээччитэ Констанция Никифорова СӨ Дьиэ кэргэн уонна Ыччат политикатын министиэристибэтин “Дьулуур” анал бэлиэтинэн наҕараадаламмыта (2017); Бүтүн Россиятааҕы “Россия талааннара” күрэх “Чинчийэр үлэлэр уонна бырайыактар” номинациятыгар IV кылаас үөрэнээччитэ Сережа Борисов кыайбыта (2018); “Суруналыыстыка” номинацияҕа IX кылаас үөрэнээччитэ Диана Терентьева эмиэ кыайыылаах аатын сүкпүтэ. “Видеоҕа айар үлэ” номинацияҕа Миша Сидоров, Давид Павлов дипломант буолбуттара.
Хаартыскаларга: 1. “НВК” диктора Влад Давыдовтыын. 2. “Кустук” телестудия тутаах дьоно.