Конституция-2020 туһунан Орто Халыма Өлөөкө Күөлүттэн суруйаллар.
Дьон иитэ ылбыт кыылыгар эппиэтинэстээх буолуохтаах
114 ыстатыйа 1 чааһын Е5 пуунугар уопсастыба хамсыыр харамайдарга эппиэтинэстээхтик сыһыаннаһыытын туһунан суруллубут. Мин бу этиини кытта сөбүлэһэбин уонна бу хайысхаҕа элбэх суолталаах үлэ барарыгар баҕарабын.
Бары да билэрбит, истэрбит курдук, кэнники кэмҥэ бэйдиэ сылдьар ыттар тулалыыр эйгэҕэ кутталы үөскэтэллэр. Ол курдук оҕоҕо-кырдьаҕаска, бэл диэтэр, тыа сирдэригэр кыра сүөһүгэ саба түһүүлэрэ элбээтэ. Маны таһынан, көрүүтэ-истиитэ суох сылдьан араас ыарыыны тарҕаталлар.
Бу кыһалҕа ханна да тиий улааттар улаатан, аан дойду үрдүнэн бүрүүкээн эрэр курдук. Тоҕо диэтэххэ, дьон харамайдары иитэ ылан баран, араас биричиинэнэн быраҕан кэбиһэллэр.
Ол эппиэтинэһэ суох быһыыттан тахсар дии саныыбын. Оҕолор эппиэтинэс диэн тугун кыра саастарыттан ыла өйдөөн улааттахтарына, бу балаһыанньаттан тахсыа этибит дуу..
Милена Ноговицына, 9 кылаас. 14-дээх «Эдэр корреспондент» пост эдкора.
Сайдыылаах кэмҥэ олорон, доруобуйабытын харыстаабат быһыы-майгы тахсарын көрө-билэ сылдьан, сатаан тохтоппот олус абалаах
72 ыстатыйа 1 чааһын Ж пуунугар: «Сохранение и укрепление общественного здоровья, создание условий для ведения здорового образа жизни, формирования культуры ответственного отношения граждан к своему здоровью»,- диэн суруллубут. Бу наһаа наадалаах этии. Билигин сайдыылаах кэмҥэ олорон, доруобуйабытын харыстаабат быһыы-майгы тахсарын көрө-билэ сылдьан сатаан тохтоппот, туораппат абалаах баҕайы. Холобур, аныгы оҕо аһылыга барыта түргэнник оҥоһуллар, итии ууну куттахха буһа охсор, хаппыт, гаастаах , араас туманан тупсарыллыбыт аһылык буолла. Ити барыта оҕо куртаҕар буортулаах.
Дьиҥэр, биһиги төрүт аспытын оскуолаларга, уһуйааннарга киллэрэн, аһылыкпыт культуратын уларытан, тупсаран биэрэр кэм кэллэ. Оҕо кыра сааһыттан «бу миэхэ доруобуйабар буортулаах, оттон бу миэхэ туһалаах” диэн өйдүү улаатара уонна ону тутуһара наада. Онуоха наар оскуола дуу, уһуйаан дуу, быраас дуу эрэ этиэхтээх, үөрэтиэхтээх диэн буолбатах. Хас биирдии киһи, төрөппүт итини кытаанахтык өйдөөн ылынара наада.
Оттон биһиги билигин оҕолорбутун, бэйэбитин доруобуйабытын харыстыырга, чөл туруктаах буоларга ииппэтэхпитинэ, кэлэр ыччаппыт олус оҕустарыа дии саныыбын. Онон аһылыкпытыттан саҕалаан, иллэҥ кэмҥэ хамсаныыны, спорду сайыннарыахпытын наада.
Изабелла Ноговицына, саха тылын уонна литературатын учуутала.
Өлөөкө-Күөл, Орто Халыма.