«Кэскил», уруккута «Бэлэм буол», хаһыаты ааҕар буолуохпуттан арахсыспат аргыһым буолар. Ааҕан баран, сөбүлээбит матырыйаалбын кырыйан, анал тэтэрээккэ үлүбээй силимнээн кэбиһэрим. Ону учууталым Уйбаан Ороһуунускай тиэмэлэринэн наардаан, күнүн-дьылын бэлиэтээн иһэрбэр сүбэлээбитэ. Оннук мунньуум ахсаана 500 буолла.
Оҕо интэриэһинэн көрөн, паапка оҥорор, матырыйаалы мунньар туһалаах эбит. Оҕо улаатан истэҕин аайы, бэйэтэ мунньарын ситиһиэххэ наада. Холобур, суруйааччылар тустарынан мустахха, сыыйа айымньыларыгар интэриэс күөдьүйэрэ саарбаҕа суох. Күһэйиэххэ, кучуйуохха, көҕүлүөххэ!
Онно төрөппүт, учуутал уонна бибилэтиэкэр оруоллара улахан буолуохтаах. Кинилэр, биир кэм салгыбакка, ирдиэхтэрин, бэрэбиэркэлиэхтэрин наада. Оччоҕо оҕо бастаан утаа сорудах курдук ылынан, кэлин бэйэтэ баҕаран туран ааҕар буолар.
Паапкаларбын оҕолор реферат, дакылаат суруйалларыгар, презентация оҥороллоругар, биктэриинэ таайалларыгар туһаналлар. Ол курдук, М.Н. Тимофеев-Терешкин төрөөбүтэ 150 сылыгар аналлаах улуустааҕы НПК-ҕа Оля Данилова бастакы миэстэни ылбыта.
Урут хаһыат бары нүөмэрдэрин бииргэ тиһэр эбит буоллахпына, билигин биэстии нүөмэринэн тиһэбин, оччоҕо оҕолорго барыларыгар тиксэр, хас биирдиилэригэр араас сорудаҕы биэрэргэ да үчүгэй. Тапталлаах хаһыатым ыытар бары куонкурустарыгар, үлэлэригэр үөрэтэр оҕолорбун сыһыара, кытыннара, аахтара, суруйтара сатыыбын.
Хаһыат – киһи арахсыспат аргыһа. Оҕо хаһыаты, сурунаалы ааҕан үгүһү билэр, араас оонньуулары, таайбараҥнары таайар, куонкурустарга кыттар.
Бэргэн уол «Бэлэм буол» бастакы таһаарыытыттан күн бүгүнүгэр диэри Саха сирин эдэр кэрэспэдьиэннэрин түмэн үлэлэтэр, оҕолор айар дьоҕурдарын сайыннарар. «Кэскил» хаһыат билии- көрүү аартыгын дабайарга күннэтэ көмөлөһөр, үтүөҕэ, кэрэҕэ уһуйар үтүө доҕорбут.
Любовь Сергеевна ТИТОВА,
“Үнүгэс” пост салайааччыта.
Түбэй Дьаархан, Сунтаар.