Арай эйигин: “Биир күн биһиги тэрилтэбитигэр кэлэн үлэлээ”, – диэхтэрэ. Ха-йыаҥ этэй? Сөбүлэһиэҥ дуо? “Билбэппин, сатаабаппын” – диэн, баҕар, долгуйуоҥ. “Барытын көрдөрүөхпүт, быһаарыахпыт, үөрэтиэхпит”, – диэн уоскутуохтара.
Оҕо көмүскэлин күнүгэр “Энергосбыкка” тиийбит дьон соһуйбуттара. Киирэр аантан, толуон ылар терминалтан саҕалаан, оскуола оҕолоро үлэлии сылдьаллара. Онтон ыйыталаһан билбиттэрэ – “Якутскэнерго” тэрилтэҕэ бэйэни салайыныы күнэ эбит.
Биһиги эдэркээн үлэһиттэри кытта көрсөн кэпсэттибит.
Иҥнибэккэ, добдугураччы
Валерия КИРИЛЛИНА Н.А. Алексеева техническэй лиссиэйигэр үөрэнэр. Ахсыһы бүтэрбит. Кыыс ийэтэ бааҥҥа үлэлиир, эбиитин эрдэттэн бэлэмнэммит буолан, үп-харчы, төлөбүр туһунан биэс тарбаҕын курдук бэркэ билэр.
Бүгүн тугу гыныахтааҕын туоһуласпыппар, “Сбербанк” үлэһититтэн итэҕэһэ суох, эйэҕэстик, өйдөнөр курдук, сиһилии кэпсээтэ:
– Мин кэлбит дьоҥҥо “Сбербанк” нөҥүө төлөбүр туһунан дьоҥҥо кэпсиэхтээхпин.
Биһиги килийиэннэрбит, дьиэлэриттэн ханна да тахсыбакка, олох-дьаһах өҥөлөрүн “Сбербанк Онлайн” мобильнай сыһыарыы нөҥүө төлүүр кыахтаахтар. Ол хайдах? Онуоха икки ньыманы туһаныаххытын сөп: штрих-кодунан уонна “Автоплатеж” диэн өҥөнөн. Бастакытыгар кыбытаансыйаҕыт уонна “Сбербанк Онлайн” сыһыарыы наада. Оттон “Автоплатеж” холботтордоххутуна, счеккутугар харчылаах буолуохтааххыт. Ханна эрэ баран, каасса көрдүү сүүрбэккит, уочараттыы турбаккыт, кэмэ кэллэҕинэ, бэйэтэ уһулан ылар, – диэн Валерия, хоһоону но-
йосуус ааҕар курдук, биир кэм тохтообокко, иҥнэн турбакка добдугуруур.
Туох да ыарахана суох…
Станислав КИСЕЛЕВ, IX кылаас, 21 №-дээх оскуола, Дьокуускай:
– Бүгүн консультант оруолун толоро олоробун. “Личный кабинет” туһунан дьоҥҥо кэпсиэхтээхпин, быһааран, көрдөрөн биэриэхтээхпин. Биир киһиэхэ номнуо кэпсээтим, – диир.
“Тус кэбиниэт” туһунан токкоолостум. Хайдаҕый? Тугуй?
– Туох да ыарахана суох, судургу. Счетуҥ нүөмэрин, электроннай почтаҕын, төлөпүөнүҥ нүөмэрин суруйуоххун наада. Онтон күлүүс тылы толкуйдуугун, – диэн Станислав холку баҕайытык кэпсээтэ, көмпүүтэр экраныгар көрдөрөн биэрдэ.
Түгэни туһанан, таарыйа, “тус кэбиниэттэнэн” хаалыахпын баҕардым да, кыбытаансыйабын илдьэ тиийбэтэхпин. Хайыахпыный, махтанан баран, туран бардым.
Оҕолор, эһиги туохха барытыгар түргэнник, сылбырҕатык үөрэнэр кыахтааххыт. Барытын иилэ хабан, тута-бааччы ылынар үгэстээххит. Оҕо үксэ оннук. Онон саҥаны, сонуну билэртэн толлумаҥ.
Айыына КСЕНОФОНТОВА.