Итинник дииллэр Хаҥалас улууһун Чкаловыттан күһүҥҥү каникулларыгар кэлбит оҕолор. Кинилэр сынньалаҥнарын туһалаахтык атаараары, “I Speak English” оскуолаҕа үөрэнэллэр.
— Бүгүн Великобритания сиригэр олохтоммут Хеллоуин бырааһынньыга. Омуктууттан “вечер всех святых” диэн тылбаастанар. Бу күн бары маскаараат буолаллар уонна тыыкыба банаары уматаллар. “Абааһылары үөдүтэҕит”, — диэн буойдаллар даҕаны, Хеллоуни оҕолор уонна ыччат олус сөбүлүүр, эрдэттэн көстүүм оҥостон бэлэмнэнэр. Биһиги эмиэ оскуолабытыгар урут бэлиэтиир этибит. Бастакы чиэппэри түмүктүүр тэрээһин курдук буолара. Быйыл бобоннор ылбатыбыт. Хата, ол оннугар манна кэлэн, билиибитин хаҥатабыт. Аныгы киһи ангылычаанныы көҥүл кэпсэтиэхтээх дии саныыбыт. Ол иһин биһиги, төһө да 30-ча эрэ үөрэнээччилээх оскуолаҕа үөрэннэрбит, аан дойду барыта билинэр тылын баһылыырга кыһаллабыт. Учууталбыт Евгения Егоровна Павлова. Төрөппүттэрбит биһигини өйөөн, харчыларын кэрэйбэккэ, бу Дьокуускайга ыыппыттарыгар махтанабыт. Дьиҥэр, баччаларга биһиэхэ хаайтарыы кэмэ. Ол эрээри быйыл дьыл хойутаан, өрүспүт турбакка, мотуорканан Тиит Арыыга туораабыппыт. Бэйэбит буоллаҕына эргиччи тула уу дойдуга – Чкалов арыытыгар – олоробут. Арыыбыт туората 4 км, устата 12 км. Төһө да кыратын иһин, мантан улуу дьон үүнэн тахсыбыта: бырааттыы Ксенофонтовтар, бастакы лүөччүк Иван Федоров. Өссө да элбэхтэр. Биһиги эмиэ кинилэр курдук, Чкалов арыытын аатырдар дьон буолуохпут, — дииллэр Хаҥалас улууһун III Малдьаҕар VII кылааһын үөрэнээччилэрэ.
Хаартыскаларга: 1,3. Хеллоуни бэлиэтиибит. 2. Сэттистэр үһөүбүт эрэ. 4. Маннык айаннаан кэллибит.