2019 сылга И.Е. Винокуров аатынан Хатыҥ Арыы орто оскуолатын уопсайа 18 ыччат бүтэрдэ. Кинилэр бары «Ылдьаа ыччаттара» оҕо хамсааһынын бастыҥ кыттааччылара буолаллар. Алта оҕо үрдүк, уоннааҕылар орто үөрэххэ киирдилэр.
Хатыҥ Арыы нэһилиэгэр сайыҥҥы кэмҥэ үс сезон устата уопсайа 35 оҕо «Бригантина» диэн сервиснэй этэрээккэ волонтерунан үлэлээтэ. Оҕолор нэһилиэк ыраас буолуутугар, сквердэргэ уу кутуутугар, Олоҥхо ыһыаҕар ыытыллыбыт араас тэрээһиннэргэ, бэтэрээннэргэ, инбэлииттэргэ оҕуруокка көмөҕө, Кыайыы 75 сылыгар анаан сквер күрүөтүн кырааскатыгар, Чаҕылҕан скверын өрөмүөнүгэр, биэрэк кытыытын ыраастааһыныгар о.д.а. үлэлэргэ бэс ыйыгар 15, от ыйыгар 14, атырдьах ыйыгар 6 оҕо күргүөмнээхтик кытынна. Манна элбэх оҕолоох, кыаммат дьиэ кэргэнтэн, ПДН, КДН учуотугар турар оҕолор хабылыннылар. Этэрээттэри Надежда Сивцева, Эдита Софронова, Анастасия Никонова үлэлэттилэр.
Сайын устата оскуолаҕа иитээччи педагог Матрена Винокурова-Мото Куо салайан ыытар «Айар кут — Голливуд» лааҕырыгар өрөспүүбүлүкэ араас муннуктарыттан 300-кэ оҕо сырытта.
Быйылгы үөрэх дьылыгар И.Е. Винокуров аатынан Хатыҥ Арыы орто оскуолатыгар быһа холоон 290 оҕо үөрэнэ кэлиэ. Уопсайа 19 кылаас кэмпилиэгэ баар, оскуолаҕа 6 учуутал математика, английскай, обществознание, химия предметтэригэр кэллилэр, олортон 4-дэ эдэр учууталлар. Быйыл икки маҥнайгы кылаас арыллан, 22 оҕо аан маҥнай оскуола боруогун атыллыахтара. Учууталларынан Людмила Васильевна Винокурова, Варвара Романовна Афанасьева үлэлиэхтэрэ, кырачаан дьону ааҕарга, суруйарга үөрэтиэхтэрэ.
И.Е. Винокуров аатынан анал истипиэндьийэни 11 кылаас үөрэнээччитэ Туйаара Софронова уонна Хатыҥ Арыы орто оскуолатын учуутала, кылаас салайааччыта Алевтина Афанасьевна Алексеева, Михаил Петрович Попов анал истипиэндьийэтин Мирослав Евграфов, Юлия Игнатьева ыллылар. Сыллата оскуолаҕа учууталлар бэйэлэрин анал истипиэндьийэлэрин үгүс ситиһиилээх, бастыҥ, актыбыыс үөрэнээччилэргэ туттараллара элбээтэ. Ол курдук, хаһыс да төгүлүн бэйэтин анал истипиэндьийэтин Валентина Ивановна Максимова Семен Сивцевка анаата, оттон Анна Ефимовна Васильева «Чаҕылыс» литературнай түмсүү уолаттарыгар Константин Колесовка уонна Кирилл Егоровка туттарда. Бурнашевтар дьиэ кэргэттэрин ааттарыттан Нинел Афанасьевна Бурнашева лидер хаачыстыбалаах, актыбыыс, «Ылдьаа ыччаттара» оҕо хамсааһынын чилиэнигэр Моника Евстафьеваҕа туттарда. Александр Филиппович Тохтобин уонна Лена Тарасовна Сивцева улахан дьиэ кэргэттэрэ бэйэлэрин анал истипиэндьийэлэрин анаабыттара хаһыс да сыллара буолла. Тохтобиннар истипиэндьийэлэрин ОБЖ, эт-хаан өттүгэр бастыҥ көрдөрүүлэрдээх үөрэнээччилэргэ Александра Федороваҕа уонна Туйара Евсееваҕа туттардылар. Намнааҕы бизнес-инкубатор (дир. А.И.Винокуров) «Предприниматель» диэн истипиэндьийэтин Валерия Сысолятинаылла. Быйыл омук тылыгар, филология өттүгэр үчүгэй көрдөрүүлээх оҕоҕо анаан, оскуола омук тылын учуутала Олег Аполлонович Охлопков саҥа анал истипиэндьийэтин Анастасия Саморцеваҕа туттарда.
Граф Биэрэгинээҕи ситэтэ суох оскуолаҕа быйыл 66 оҕо үөрэниэҕэ. Уопсайа 9 кылаас кэмпилиэгэ баар, маҥнайгы кылааска 7 оҕо үөрэнэ киириэҕэ, учуутал Алексияна Алексеевна Бурцева үөрэтиэҕэ. 9-с кылааһы 2019 сылга биэс үөрэнээччи бүтэрбит, онтон икки оҕо Намнааҕы техникумҥа үөрэнэ киирбит. 
Ааптар: Н.Д. СИВЦЕВА, ulusmedia