«Хадаар түһүлгэтэ» өрөспүүбүлүкэтээҕи мас тардыһыы күрэхтэһиитин тэрээһинигэр оскуола үөрэнээччилэрэ улахан көмөнү оҥордулар. Оскуолабыт коллективын иннигэр улахан күрэхтэһиини үрдүк таһымнаахтык ыытар сорук эрдэттэн турбута. Онон Добро.ру саайка 50 оҕо регистрацияланан, волонтерскай үлэ түөрт хайысхатыгар арахсан көмөлөстүбүт.
Ол курдук, улахан кылаас кыргыттара оскуола буфетыгар атыыга тахсар аһы буһарарга көмөлөстүлэр. IX-XI кылаас уолаттара оскуола буфетыттан күрэхтэһии буолар сиригэр – спортсаалаҕа ас тастылар. VI-IX кылаас уолаттара спортсаала буфетыгар бэрээдэги онтон орто кылаас кыргыттара спортсаала ырааһын көрдүлэр-иһиттилэр.
Ас буһарыыта, оскуолаттан ас таһыыта үлэлээх дии санаатым.
Ол эрээри оҕолор бары бииргэ үлэлээн, Хадаар күрэхтэһиитэ үрдүк таһымнаахтык ыытылларыгар кылааттарын киллэрдилэр, үтүө санаа үлэтигэр кыттыстылар.
Алена НОЕВА, VIII кылаас,
С.Д. Флегонтов аатынан Хадаар орто оскуолата, Чурапчы