«Эргиэн кэскилэ» — саҥа бырайыак. Дьоҕус сурунаал үп-харчы, атыы-эргиэн эйгэтин кистэлэҥнэрин оҕо аймахха сырдатыаҕа. Кини кэнчээри ыччакка бизнес курдук уустук дьыала киэҥ аартыгар сирдиир ыллык суол буолуоҕа.
«Эргиэн» бизнес-сообщество төрүттээччитэ Семен Посельскай бэртээхэй бырайыагы «Кэскил» оҕо бэчээтин кыһатын көмөтүнэн олоххо киллэрдэ. «Эргиэн кэскилэ» сурунаал бастакы нүөмэрин Сардаана Матвеева бэлэмнээтэ.
«Кэскил» оҕо бэчээтин кыһатын директора Ольга Семенова сурунаал хас биирдии ааҕааччыга үтүө дьайыыны оҥоруоҕар бүк эрэнэр. Манна билиҥҥи олох тэтимигэр бизнеһы сайыннарыыга, булугас буолууга уонна булчут өбүгэбит булар-талар ураты кыахтааҕын санатар элбэх, баай ис хоһоонноох сүбэ-соргу баарын бэлиэтиир. Ольга Ивановна этэринэн, сурунаал бүгүҥҥү күн форматтарыгар барытыгар сыстан тахсар буолуоҕа. Хаартыскалар тиллиэхтэрэ, буукубалар дорҕооҥҥо кубулуйуохтара. Оччоҕо сурунаал дьоруойа Эргиэн уол ыыра кэҥиэҕэ, ычата улаатыаҕа.
Үөрэхтээһин бырайыактарын продюсера, «Эргиэн кэскилэ» сурунаал ааптара Семен Посельскай бу таһаарыы информационнай эрэ үлэнэн муҥурданыа суоҕа диир. Бастакы нүөмэргэ номнуо кейс-сорудахтар таҕыстылар. Бастыҥ толкуйдаах оҕолору ситиһиилээх урбаанньыты кытта икки чаастаах көрсүһүү күүтэр. Онтон уһулуччу үчүгэй толкуйдар инвест-өйөбүлү уу харчынан ылыахтара.
Бырайыак ааптара суранаал сүрүн дьоруойа Эргиэн уол от ыйын 30 күнүгэр күн сирин көрбүтүн бэлиэтиир. Кини элбэх доҕордоох, хас биирдиилэригэр үтүө сыһыаннаах, өйдөөх үтүөтэ, майгылаах бастыҥа эр бэрдэ буола улааттын! Төрөөбүт күҥҥүнэн эҕэрдэ, Эргиэн уол!
Ааптар: Мария Корякина