Эбээн-Бытантайга М.Н. Другин бирииһигэр көҥүл тустууга маҥнайгы улуустааҕы аһаҕас турнир буолла. «Хаарчаана» уһуйаан кырачаан бөҕөстөрө тустуу курдук уустук успуорка сатабылларын, дьоҕурдарын көрдөрдүлэр. Төрөппүттэр оҕолорун киирсиилэрин биир тыынынан көрдүлэр.
Саккырыырга ыытыллыбыт М.Н. Другин бирииһигэр тустууга 6 ыйааһыҥҥа 27 бөҕөс көбүөргэ таҕыста. Эрийсиилээх киирсиилэр, хабыр хапсыһыылар манна буоллулар.
Күрэҕи тэрийээччилэр оҕо спордун энтузиастара, кэргэнниилэр Христина, Петр Стручковтар уһуйаан иитиллээччилэрин бэркэ диэн бэлэмнээбиттэр. Стручковтар бу бастакы күрэхтэһиилэрэ буолбатах. Өссө олунньу ыйга кинилэр быһа дьаһалларынан, уһуйаан иитиллээччилэригэр хапсаҕай күрэҕэ буолбута. Бу туһунан Ulus.Media сайт бэрт сэргэх репортаж суруйан турар. Бу күрэххэ эмиэ элбэх оҕо кыттыыны ылбыта. Улуус тутаах тэрилтэлэрэ, биирдиилээн урбаанньыттар, уһуйаан сэбиэдиссэйэ Любовь Стручкова оҕо спордун өйөөн, харчынан көмө оҥорбуттара. Онон кырачааннар билигин алын сүһүөх оскуола спортивнай саалатыгар саҥа маакка үөрэ-көтө дьарыкка сылдьаллар.
Күрэҕи арыйар чааһы Оҕо саас киинин иитиллээччитэ Надя Мигалкина ылбаҕай ырыатынан, «Хаарчаана» уһуйаан «Сулусчаан» улахан бөлөх кыракый кыргыттара акробатическай нүөмэринэн киэргэттилэр.
Тыҥааһыннаах күрэх дьэ саҕаланна. Кыракый бөҕөстөр көбүөргэ кииристилэр. Төһө да уһуйаан иитиллээччилэрэ буолбуттарын иһин, сорох оҕолор күүстээх дьарыктаахтарынан, техническай албастары сатыылларынан улахан тустууктартан хаалсыбаттара көһүннэ. «Сулусчаан» улахан бөлөх иитиллээччитэ Айхал Свинобоев кыраһыабай киирсиитинэн сыалай икки номинация хаһаайына буолла, кини «Бастыҥ киирсии» уонна «Кыраһыабай быраҕыы» анал ааттары ылла. Эмиэ бу бөлөх иитиллээччитэ Егор Константинов эмиэ «Кыраһыабай быраҕыы» диэн анал ааты сүктэ. «Кыайыыга дьулуурун иһин» анал ааты «Кустук» улахан бөлөх иитиллээччитэ Павел Слепцов ылла. Бу анал ааттары, бириистэри оҕо-аймах спортивнай оскуолатын аатыттан дириэктэр Дмитрий Саввинов үөрүүлээх быһыыга-майгыга туттарда.
Иккис төгүлүн ыытыллыбыт хапсаҕай күрэҕин абсолютнай кыайыылааҕа Арчылан Гороховка Михаил Другин балта Лилия Николаева анаабыт «Бастыҥ техникалаах тустуук» диэн үрдүк ааты уонна бирииһи туттардылар. Эмиэ Михаил Николаевич балта Клара Стручкова-Захарова туруорбут «Саамай кыра саастаах бөҕөс» анал аатын «Үрүмэччи» орто бөлөх иитиллээччитэ Еремей Рожин сүктэ.
Күрэх тэрийээччилэрэ Стручковтар дьиэ кэргэттэрэ анаабыт «Кэскиллээх тустуук» анал ааты «Күнчээн» бэлэмнэнии бөлөх иитиллээччитэ Ариан Ефимов ылла. Спорду өрө тутар эдэр ыал Маргарита, Виктор Обутов дьиэ кэргэттэрэ туруорбут «Кыайыыга дьулуурун иһин» анал ааты «Күнчээн» бөлөх иитиллээччитэ Эрсан Сыроватскай ылла. Төрөппүт сүбэтэ «Күнчээн» бэлэмнэнии бөлөх иитиллээччитигэр Айысхан Никитиҥҥа «Көрөөччүлэр биһирэбиллэрэ» анал ааты туттарда.
Спорт маастара Михаил Другин бирииһигэр күрэх түмүгэ маннык буолла: 18 киилэ ыйааһыҥҥа: 1 м. – Рожин Еремей («Үрүмэччи» бөлөх), 2 м. – Власий Дмитриев («Сулусчаан»), 3 м. – Денис Стручков («Нөлтэнкэ»), Герман Ефимов («Сулусчаан»). 19 киилэ ыйааһыҥҥа: 1 м. – Егор Константинов («Сулусчаан»), 2 м. – Айхал Свинобоев («Сулусчаан»), 3 м. – Марк Жирков («Күчээн»), Дамир Петров («Сулусчаан»). 20 киилэ ыйааһыҥҥа: 1 м. – Аркадий Рожин («Күнчээн»), 2 м. – Алеша Устинов («Күнчээн»), 3 м. – Даниэль Старостин («Сулусчаан»), Вася Мигалкин («Нөлтэнкэ»). 21 киилэ ыйааһыҥҥа: 1 м. – Ариан Ефимов («Күнчээн»), 2 м. – Эрсан Сыроватский («Күнчээн»), 3 м. – Коля Сысолятин («Кустук»), Миша Колесов («Күнчээн»). 23 киилэ ыйааһыҥҥа: 1 м. – Саян Данзанов («Кустук»), 2 м. – Аймерген Апитов («Кустук»), 3 м. – Алеша Петров (Сулусчаан»), Айырхан Константинов («Нөлтэнкэ»). 23 киилэттэн үөһээ ыйааһыҥҥа: 1 м. – Арчылан Горохов («Күнчээн»), 2 м. – Айысхан Никитин («Күнчээн»), 3 м. – Дьулуур Стручков («Нөлтэнкэ»), Алгыс Горохов («Нөлтэнкэ»).
Ааптар: Сардаана Копырина