Мин хос эһэм Рожин Григорий Алексеевич-Киргиэлэй оҕонньор 1897 сыллаахха тохсунньу ый 16 күнүгэр Хаҥалас улууһун III Малдьаҕар Харыйалааҕар маҥнайгы оҕонон төрөөбүтэ. Аҕата Алексей Ивановч Рожин, ийэтэ Мария Семеновна Рожина барыта 4 оҕоломмуттар.
Эһэм оҕо сааһа хайдах ааспытын ким билиэ баарай? Ахтыылартан иһиттэххэ, ийэлээх аҕата киниэхэ сыстан олорбуттар. Онтон оҕо сааһа үксэ биллибэт.
1937 сыллаахха улахан уу-мотуок кэлэн, Харыйалааҕы ылан кэбиһэр. Рожиннар Еланкаҕа кэлэн олохсуйаллар. Эһэм ол саҕана сытыы-хотуу, салайар дьоҕурун көрдөрөн, соторунан Еланка холкуоһун бэрэссэдээтэлин солбуйааччытынан үлэтин саҕалаабыта. Хомойуох иһин, эһэм үөрэҕэ суох буолан, суоту билбэтиттэн сыыһалар тахсаннар, сотору кэминэн үлэтиттэн тохтоппуттара.
Аҕа Дойду Улуу сэриитин кэмигэр ферма биригэдьииринэн үлэлээбитэ. 1941 сыллаахха атырдьах ыйыгар хомуур кэмигэр Григорий Алексеевич улахан уола Афанасий Григорьевич Рожин Дьокуускайга Речной оскуолаҕа үөрэнэ сылдьан, сэриигэ ыҥырыллан барар. 1942 сыллаахха сэриигэ сылдьан ыараханнык бааһыран, бэс ыйыгар сэрииттэн төннөн кэлэр. Эһэм фермаҕа сылдьан үлэтин быыһыгар араас тэриллэри маһынан оҥороро. Таһаарыылаах үлэтэ сыаналанан, акка сыарҕа муҥунан ас тиэйэн аҕалара. Хос эбэбин кытары Анна Романовна Рожиналыын сүөһү иитэллэрэ. Эбэм чемпион доярка буолбута, Верховнай совет грамота, мэтээл туттарбыта. Эбэлээх эһэм сэрии ыарахан кэмнэригэр үлэһит бэрдэ буоланнар, олус кыахтаахтык олорбуттара. Эһэм сэрии кэминээҕи таһаарыылаах үлэтэ сыаналанан, Сталин мэтээлинэн наҕараадаламмыта.
Сэрии кэнниттэн эһэм сааһыран баран, сүөһү бостуугунан үлэлээбитэ. Хос эһэм барыта 4 оҕолоох: 2 кыыс, 2 уол. Олортон 12 сиэн, 27 хос сиэн тэнийбит.
Ити курдук кыайыыны уһансыбыт, дойдуларын тустарыгар үлэлээбит үтүө дьоннорбут холобурдарынан биһиги эдэр ыччат киэн туттабыт, ытыктыыбыт.
Бу курдук үтүөкэн дьоммут олохторо, кинилэр сырдык мөссүөннэрэ хаһан даҕаны умнуллуо суоҕа. Өйдүүбүт! Киэн туттабыт!
Аман Еремеев М.Е Васильева аатынан 2 Малдьаҕар орто оскуолатын 9 кылааһын үөрэнээччитэ. Матырыйаалы суруйарга ахтыылары тиксэрдэ Григорий Алексеевич сиэнэ Анисия Афанасьевна Рожина