Төрдүн-ууһун билэр оҕо дойдуга бэриниилээх буола улаатар
Бүгүн, кулун тутар 4 күнүгэр, Дьокуускай куоракка аан бастакытын ыытыллар «Мин дьиэ кэргэним Аҕа дойду историятыгар» дьиэ кэргэн форума үгүс киһини «Россия – мин историям» мусуой-пааркаҕа муста.
Өссө Саха Өрөспүүбүлүкэтин Ил Дархана Айсен Николаев 2023 cыллааҕы туһаайыытыгар өрөспүүбүлүкэ норуоттарын төрүччүлэрин оҥорууга, төрүт култуураҕа, дьиэ кэргэн үгэстэрин харыстааһыҥҥа болҕомто ууруллуохтааҕын туһунан этэн турардаах.
Билигин төрүччүнү үөрэтии киэҥ далааһыннанна: уһуйаан оҕолоруттан саҕалаан оскуола үөрэнээччилэрэ үгүстэрэ төрдүлэрин-уустарын билэллэрэ, ону таһынан, баҕа өттүнэн чинчийэллэрэ, ону тарҕаталлара үксээтэ. Манна Н.Е. Мординов-Амма Аччыгыйа аатынан «Кэскил» оҕо бэчээтин кыһата уонна Саха Өрөспүүбүлүкэтин Хотугу дойду норуоттарын генеалогиятын уонна этнологиятын билимин чинчийэр института номнуо үһүс сылын тэрийэн ыытар төрүччүнү чинчийэр кэмпириэнсийэтин үлэтигэр да көстөр.
«Мин дьиэ кэргэним Аҕа дойду историятыгар» дьиэ кэргэн форума маҥнайгы чааһыгар кыраайы үөрэтээччилэр, историктар, архив үлэһиттэрэ, педагогтар, учууталлар, төрөппүттэр, биирдиилээн туһааннаах дьон кыттыылаах төгүрүк остуоллар ыытылыннылар.
Биир сүрүн боппуруоһунан эһиилги үөрэх дьылыгар оскуолаларга киириэхтээх «Семьеведение» үөрэх чааһыгар төрүччүнү үөрэтиини киллэрии, уруокка көмө матырыйааллары оҥорууга болҕомто уурулунна.
Дьиэ кэргэн форума үлэтин иккис чааһыгар араас хайысхалаах маастар-кылаастардаах дьиэ кэргэн квест оонньуута тэрилиннэ. Манна «Кэскил» партнердара: Бастыҥнар хамсааһыннара, «Оҕо саас сирдьиттэрэ», «Харысхал» аһымал пуондата, «Айар уустар» колледж көхтөөх кыттыыны ыллылар.
Ил Дархан граннарын күрэҕин кыайыылааҕа «Мин дьиэ кэргэним Аҕа дойду историятыгар» дьиэ кэргэн форумун тэрийээччилэринэн «Эрэгийиэннэр икки ардыларынааҕы оҕо уонна ыччат медиатын сайыннарыыга киинэ» кэммиэрчэскэйэ суох уопсастыба, Н.Е. Мординов-Амма Аччыгыйа аатынан «Кэскил» оҕо бэчээтин кыһата уонна Саха Өрөспүүбүлүкэтин Хотугу дойду норуоттарын генеалогиятын уонна этнологиятын билимин чинчийэр института буолаллар.
Сиһилии видеосюжекка көрүҥ:
keskil14.ru