1941-1945 сс. Аҕа дойду Улуу сэриитигэр өрөгөйдөөх Кыайыы 80 сылын көрсө «Кыайыы Знамята» өрөспүүбүлүкэтээҕи эстафетата биһиги улууспутугар, Чурапчыга, тохсунньу 22-23 күннэригэр буолуоҕа.
Ол курдук, тохсунньу 22 күнүгэр — Чыаппара, Бахсы, Мугудай, Төлөй, Одьулуун, Хоптоҕо, Хадаар, Хайахсыт, Чакыр, онтон тохсунньу 23 күнүгэр Арыылаах, Кытаанах, Сылаҥ, Чурапчы, Болугур, Мырыла, Болтоҥо, Хатылы нэһилиэктэригэр көрсүөхтэрэ.
Тохсунньу 24 күнүгэр «Кыайыы Знамята» эстафета салгыы Таатта улууһугар айанныаҕа.
Сарсын, тохсунньу 22 күнүгэр, биһиги нэһилиэкпит Кыайыы Знамятын көрсөргө бэлэмнэнэр. Бу улахан суолталаах тэрээһинэ Аҕа дойду Улуу сэриитин кыттыылааҕа, биэс бойобуой уордьан кавалера Семен Дмитриевич Флегонтов аатын сүгэр оскуолабытыгар ыытыллыаҕа. Оскуола үөрэнээччилэрэ, нэһилиэк олохтоохторо бу бэлиэ түгэни көрсөөрү, чиэстээри бэлэмнэнэбит.
Айна БАНДЕРОВА, VII кылаас, С.Д. Флегонтов аатынан Хадаар орто оскуолатын медиа-киинин юнкора, Чурапчы