«Чуораанчык» сурунаал бэс ыйынааҕы нүөмэрэ Аммаҕа буолбут VII Спортивнай Оонньууларга анаммыта. Саха сирин биир кэрэ көстүүлээх улууһа тугунан ордук аатырарын, туох устуоруйалааҕын, ханнык чулуу дьон кини өҥ буоруттан силистээхтэрин туһунан кырачаан ааҕааччыларга сиэдэрэйдик оҥоһуллубут сурунаал сиһилии кэпсиир.
Аммаҕа ыытыллыбыт Саха сирин спордун устуоруйатыгар биир кыһыл көмүс буукубанан суруллар бэртээхэй тэрээһини «Чуораанчык» оҕо сурунаала тумнубата. Ааспыт нэдиэлэҕэ VII Спортивнай Оонньууларга анаммыт нүөмэр биһирэмэ ыытылынна.
Бу тэрээһиҥҥэ куонкурустар кыайыылаахтарын сурунаал эрэдээктэрин солбуйааччы Сардаана Матвеева эҕэрдэлээтэ. Кыайыылаахтар бириистэрин тутан үөрүү бөҕө. Сурунаал таһаарыытыгар үлэлэспит дьоҥҥо Амма улууһун баһылыгын солбуйааччыта Иванна Шишигина махтанна.
