Өрөспүүбүлүкэ күнүн көрсө, муус устар 26 күнүгэр, Кустуурбут ытык сиригэр Уһуктаах анныгар «Бытантай Эбэ бэлэҕэ» диэн балык хаптарааһынын күрэҕэ үрдүк таһымнаахтык буолан ааста.
Күрэхтэһиини «Ерелдек» бөлөх үҥкүүнэн арыйда. Араас техникалар үрэххэ диэри параадтаан киирдилэр. Саккырыыртан элбэх кыттааччы кэлэн, дьон-сэргэ өссө сэргэхсийдэ, күрэх өссө эбии тыҥааһыннанна.
Күрэххэ барыта 11 хамаанда кытынна. Оскуола оҕолоро төрөппүттэрин кытта кытыннылар. Хамаанда састааба 4-түү киһиттэн турда. Ону таһынан Эбэҕэ үгүс элбэх киһи тоҕуоруһа муһунна.
Умсугутуулаах балыктааһын түмүгүнэн Марта Горохова «Тихие удочки» хамаандата кыайыы өрөгөйүн биллэ уонна 1 буочука бэнсиининэн наҕараадаланна. 2-с бочуоттаах миэстэни Илья Рожин хамандыырдаах Кустуурдааҕы уот ситимнэрин хамаандата ылла уонна 150 лиитирэ бэнсиининэн биһирэннэ. 3-с миэстэни Кустуурдааҕы «Кэнчээри» оҕо уһуйаана ылан, 100 лиитирэ бэнсиини бириис тутта. Ону таһынан анал ааттар олохтонон, «Бастакы балык» — Иннокентий Старостин, «Улахан балык» – Саргылана Горохова, «Кыра балык» – Петр Стручков, «Элбэх балык» – Петр Горохов ылан, туоһу суругунан уонна сыаналаах бириистэринэн наҕараадаланнылар. Бары кыттааччыларга Аллараа-Бытантай нэһилиэгин олохтоох дьаһалтата туоһулуур сэртипикээти үөрүүлээх быһыыга-майгыга туттарда.
Күрэх түмүгүнэн кыайыылаахтар туоһу суругунан, сыаналаах бириистэринэн наҕараадаланнылар. Аллараа Бытантай нэһилиэгэр «Эбэ бэлэҕэ» күрэх олус үчүгэйдик ааста.
Барыгытын Арассыыйа төрүт аҕыйах ахсааннаах норуоттарын күнүнэн истиҥник эҕэрдэлиибит!
Вова ПОПОВ,
«Биракчаан» медиа-киин эдкора, Кустуур орто оскуолатын 10 кыл. үөрэнээччитэ.
Кэскил14.ру