А.Е. Мординов аатынан Тааттатааҕы лиссиэйгэ «Будущий дипломат» XIX өрөспүүбүлүкэтээҕи күрэх муниципальнай түһүмэҕэ буолан ааста.
Күрэҕи маннык састааптаах дьүүллүүр сүбэ сыаналаата: Николай Васильевич Дьяконов, 2003-2019 сс. Арассыыйа Тас дьыалаларга министиэристибэтин (МИД) Дьокуускай куоракка бастакы бэрэстэбиитэлэ, РФ бастакы кылаастаах дипломатическай сулууспа сүбэһитэ, Арассыыйа дипломаттарын Ассоциациятын сэбиэтин чилиэнэ (Москва), «Будущий дипломат» күрэх ааптара; Адамов Владислав Владимирович, Арассыыйа Тас дьыалаларга министиэристибэтин (МИД) Дьокуускай куоракка специалиһа; Румянцева Айыына Константиновна, СӨ Тас сибээскэ уонна норуоттар дьыалаларыгар министиэристибэтин аан дойдутааҕы сибээһи тутар отдел специалиһа; Луковцева Мира Николаевна, Таатта улууһун үөрэҕин управлениетын отделын салайааччыта, Унарова Римма Степановна, «Движение первых» хамсааһын специалиһа; Тарасенко Анастасия Юрьевна, Борисова Надежда Константиновна, английскай тыл учууталлара. Уопсайа 54 оҕо кыттыыны ылла.
Мин кыра кылаастар лигаларыгар дьүөгэбинээн Семенова Айааналыын кыттыбытым. Салайааччыбыт Саргылана Романовна Мосоркина, история учуутала. Уопсайа 46 оҕо баара. Күрэх бастакы түһүмэҕэр 12 бэриллибит тиэмэҕэ эссе суруйан көмүскүөхтээххин. Ол кэнниттэн экспердэр эссе тиэмэтинэн уонна Саха сирин историятыттан омук тылынан ыйытыылары биэрэллэр. Барытыгар 5 мүнүүтэ бэриллэр.
«Будущий дипломат» күрэххэ кыттыыны ылбыппыттан киэн туттабын. Түмүккэ сертификатынан уонна «Лучший эрудит» диэн анал аатынан наҕараадаланным.
Алёна ТАППЫРОВА, VII кылаас,
В.И. Ленин аатынан Уолба орто оскуолата, Таатта