2024 сыл түмүгүнэн Н.Е. Мординов-Амма Аччыгыйа аатынан «Кэскил» оҕо бэчээтин кыһатын бастыҥ юнкорун аатын ыллым. Дьокуускай куоракка наһаа үчүгэй тэрээһин буолан ааста.
Билим Дьоҕус академиятын ректора Василий Климович Павлов ыалдьыттаата. «Кэскилбит» дириэктэрэ Ольга Ивановна Семенова 30 бастыҥ юнкорга диплом, статуетка, «Бэлэм буол», «Юность Севера», «Чуораанчык», «Колокольчик» сурунааллары бэлэх уунна.
Мин «Кэскил» медиа оскуолаҕа үһүс сылбын дьарыктанабын. Хайдах үлэлээн саҕалаабыппын, улахан тэрээһиннэри хайдах сырдаппытым туһунан эһигини кытта үллэстиэхпин баҕарабын.
7-с кылааска Мэҥэ Хаҥалас улууһун Төҥүлү орто оскуолатыгар үөрэнэ тиийбитим. Оскуолаҕа «Медиа» куруһуок баар диэбиттэригэр, бастаан өйдөөбөтөҕүм. Ол иһин сиһилии барытын кэпсээн-ипсээн биэрбиттэрэ. Бастакы сылбар салайааччым: «Билим Дьоҕус академиятыгар медиаҕа дьарыктана барыаххын баҕараҕын дуо?» – диэн ыйыппыта. Үөрэ-көтө сөбүлэспитим.
Улахан махталбын Төҥүлүтээҕи салайааччыларбар Наталья Тимофеевнаҕа уонна Айталына Вальеревнаҕа тиэрдэбин. Миэхэ итэҕэйэн, күүс-көмө буолбуттарыгар, миигин өйөөбүттэригэр.
Билим Дьоҕус академиятыгар тиийэрбэр адьас тугу да сатаабат этим.

Юнкор диэн кимий, кини дьоҥҥо-сэргэҕэ туох туһалааҕый, хайдах сөпкө санаатын дьоҥҥо тиэрдиэхтээҕий, интервьюну ыларга туохха болҕомто ууруохтааҕый, дьону кытта хайдах сатаан кэпсэтиэхтээҕий, аны ону барытын видео нөҥүө хайдах тиэрдиэхтээҕий, хамаанданан үлэни юнкор хайдах тэрийиэхтээҕий диэн «Кэскил» медиа-оскуола куратордара олус күүскэ үөрэппиттэрэ, суолбутун сырдаппыттара. Миигин кытта куратордар Сардаана Анатольевна Матвеева, Кристина Олеговна Иванова үлэлэспиттэрэ. Мин кинилэргэ олус махтанабын.
Олохпор бастакы интервьюм Билим Дьоҕус академиятыгар буолбута. Бастакы видеом, монтаж үлэтэ, хаартыскаҕа түһэрии – барыта манна буолбута. Ол иһин Билим Дьоҕус академиятын олус чугастык саныыбын.
Иккис хардыым 2023 с. «Спортивные Якутяне» оскуола үөрэнээччилэрин өрөспүүбүлүкэтээҕи Спартакиадаларын сырдатыыга үлэлээбитим. Бу манна үлэлии сылдьан Олеся Турлакова буоламмыт өрөспүүбүлүкэбит Ил Дарханын Айсен Сергеевич Николаевы кытта пресс-конференцияҕа кыттыыны ылбыппыт. Ол мин олоҕум биир умнуллубат түгэнэ. Олуһун диэн үөрбүтүм уонна долгуйбутум.

Салгыы «Муус Устар» фестиваль, өрөспүүбүлүкэтээҕи Олоҥхо ыһыаҕар, «Азия оҕолоро» спортивнай оонньуулар, Москва куоракка айан… Ону кытта күүстээх үлэ, суруйуу, видеоҕа устуу, кэлии-барыы, дьону кытта алтыһыы, кэпсэтии.




Кыттыыны ылбыт саамай улахан тэрээһиним «Азия оҕолоро» спортивнай оонньуулары сырдатыы буолбута. Кураторым Снежана Прокопьевна Воронова, бииргэ үлэлээбит доҕотторум Нелли Шарина, Джулианна Дорофеева буоламмыт олус тапсан үлэлээбиппит.

Москва куоракка сылдьыахпын олуһун баҕарар этим. Үчүгэй үлэм түмүгэр «Кэскил» оҕо бэчээтин кыһатыттан Москва куоракка барар путевканы туппутум.
Биһиги Москваҕа олус үчүгэйдик баран кэлбиппит. Ол кэмтэн элбэх умнуллубат түгэннэр миэхэ хааллылар.
Үөрэммиппит, улахан медиа хампаанньалар хайдах үлэлииллэрин көрбүппүт. Оннооҕор Вконтакте офиһыгар сылдьыбыппыт, Россия Суруналыыстарын сойууһун салайааччытын кытта көрсүбүппүт.

«Кэскил» медиа оскуола миэхэ элбэх доҕоттору бэлэхтээтэ. Юнкордары барыбытын бииргэ түмэн биир хамаанда оҥорбуккутугар «Кэскил» үлэһиттэригэр уонна таптыыр, убаастыыр Ольга Ивановнабытыгар улахан, улахан махтал!

Маннык үчүгэй, интэриэһинэй суолга үктэннэрбиккитигэр махталым муҥура суох. Биһиги дьоллоох юнкордарбыт.
Гаврил ПРОКОПЬЕВ, IX кылаас,
А.Е. Кралин аатынан Абаҕа орто оскуолата, Амма