Тохсунньу 31 күнүгэр Үөһээ Дьааҥы улууһугар Арассыыйаҕа Дьиэ кэргэн, Саха сиригэр Оҕо саас, Дьааҥы улууһугар История сылларын түмүктүүр улахан үөрүүлээх тэрээһин ыытылынна. Бу үөрүүлээх дьаһаллар кэккэлэригэр В.З. Кириллина аатынан Верхоянскайдааҕы «Тымныы чыпчаала» түмэлгэ «Бастыҥнар хамсааһыннара» бастакы салаата арылынна уонна «История харамньыттара» кэккэҕэ саҥа оҕолору үөрүүлээхтик ылыы сиэрэ ыытылынна.
12 оҕо саҥа хайысхаҕа киирэллэригэр андаҕар тылларын биэрдилэр. Түмэл үлэһиттэрэ оҕолорго анаан экскурсия тэрийдилэр. Онтон 5 оскуола оҕолорун хамаандаҕа арааран, квест оонньуу оонньобуппут.
Салгыы Арассыыйаҕа Дьиэ кэргэн, Саха сиригэр Оҕо саас, Дьааҥы улууһугар История сылларын бастыҥнарын чиэстиир тэрээһиҥҥэ кытынныбыт. Бу сүдү түһүлгэҕэ Дьааҥы улууһун бастыҥ дьиэ кэргэттэрэ ааттаннылар. Сылы түмүктүүр улахан тэрээһиҥҥэ Верхоянскай улуус 16 оскуолатын Оҕо хамсааһынын тэрилтэлэригэр бастыҥнары быһаарыы күрэһэ ыытыллыбыта. Ол түмүгүнэн 5 оскуола анал аакка тиксэн кытыннылар. Онно киирдилэр Арыылаах, Боронук, Дулҕалаах, Боруулаах, Адыаччы оскуолаларын хамаандата.






«Гражданственность уонна патриотизм» ааты ылла В.С. Чириков аатынан Адыаччы орто оскуолатын «Сайдыс» оҕо тэрилтэтэ. Кинилэр 2024 сылга «Эдэр буойун курса» диэн байыаннай хомуур тэрийэн, дойдуга бэриниилээх эдэр көлүөнэни иитиигэ бэлэмнэрин көрдөрдүлэр.
Баҕа санаанан салайтаран көмөлөһүү (Добровольчество и волонтёрство) ааты «Сарыал» диэн Боронук орто оскуолатын оҕо тэрилтэтэ ылла. Боронуктар сылы быһа араас акцияларга көхтөөхтүк кыттар, аҕам саастаах дьоммутугар, поисковай-чинчийэр үлэлэргэ кыттан, анал байыаннай дьайыы кыттыылаахтарыгар, дьиэ кэргэттэригэр көмөлөһөн үлэ бөҕөтүн тэрийбиттэр.
«Үлэлээх буолуу сайына» ааты И.И. Котельников аатынан Дулҕалаах орто оскуолатын “Сандаар” оҕо тэрилтэтэ ылла. Оҕолор сайыҥҥы сынньалаҥнарын оскуола оҕуруотугар кичэллээхтик үлэлээн, үлэ үөрүйэхтэрин иҥэриммиттэр.
“Үрдүк өй уонна айар абылаҥ” ааты туох да мөккүөрэ суох “Үрдэл” Арыылаах орто оскуолатын оҕо тэрилэтэтэ ылла. Оҕолор айар эйгэҕэ киһи сөҕөр-махтайар ситиһии көтөллөнөн, ырыа, үҥкүү, уус-уран ааҕыы, билим кэмпириэнсийэлэригэр, олимпиадаларга кыттыбыттар.
“Спорт уонна чөл олох” ааты “Эрэл” диэн Боруулаах орто оскуолатын спортивнай кулууба ылла. Оскуола базатыгар 2023 сылтан улуустааҕы эти-хааны бөҕөргөтөр “Дьулуур” лааҕыр үлэлиир. Быйыл бу лааҕырга 23 эр бэртэрэ дьарыктанан, чөл олоххо уһуйуллан таҕыстылар.
Ити курдук Үөһээ Дьааҥыга “Бастыҥнар хамсааһыннара” эрэллээхтик инники күөҥҥэ сылдьар, үүнэр көлүөнэ кэскилин тэрийсэр.
Оксана Аммосова, Боронук орто оскуолатын 11 кылаас үөрэнээччитэ.
keskil14.ru