Нина Иннокентьевна барахсан хас биирдии үлэһиттэригэр – суоппардарыттан (оччолорго икки суоппардаах этибит) саҕалаан, эрэдээксийэ бары үлэһиттэрин кыһалҕаларыгар сүрэхтиин-быардыын ыалдьара, көмөлөһөрө. Урукку үтүө кэмнэргэ үгүс үлэһит дьиэнэн-уотунан хааччыллыбыта, ас-үөл кырыымчык эрдэҕинэ кууһунан эти-балыгы, бурдугу-саахары, оҕуруот аһын булуута-талыыта—кини сөҕүмэр дьаһала этэ.
Түөрт уонтан тахса киһилээх халыҥ эрэдээксийэҕэ көрдөөх-нардаах, көр-күлүү аргыстаах бырааһынньыктарбыт элбэхтик буолаллара. Онно барытыгар, биир киһи курдук, кыттарбыт. Нина Иннокентьевнабыт онтон отой хаалсыбат. Кини эдэрдии эрчимин өссө да ыһыкта илигиттэн үөрэрбит, балайда сэниэлээҕин сөҕөрбүт-махтайарбыт.
Ардыгар таҥас уларыттыылаах ахсаана суох үбүлүөйдэргэ, эгэлгэ маасканы оҥостуулаах Саҥа дьыллааҕы баалларга, үтүмэн бырааһынньыктарга кини хайаан даҕаны инники күөҥҥэ, бастакы кирбиигэ сылдьарыттан бэйэбит тэттэрбит.
Ийэ оҥостон кэбиспит Нина Иннокентьевнабытын билигин да суохтуубут, ахтабыт, тулаайахсыйабыт. Ордук кэнники кэмҥэ кини аатын үгүстүк ааттыыбыт, үйэ тухары иҥэрбит сиэригэр, түстээбит үгэһигэр бүгүҥҥү олохпутун тэҥнии сатыыбыт.
Василий Иванов.