«Артек» – урут-уруккуттан үгүс оҕо ырата, санаатын кыната. Сэбиэскэй саҕаттан пионерскай тэрилтэ сүрүн киинэ – Крым соҕуруу кытылыгар баар «Артек» лааҕыр. 1925 сыллаахха аан бастаан аһыллыбыт, 80 пионеры сынньаппыт «Артек» бастакы смената сыыйа улаатан, кэҥээн, оҕо сынньанар улахан киинэ буолбута. Аҕа дойду Улуу сэриитин кэмигэр лааҕыры Сталинградка, онтон Алтайга Белокуриха хайатын анныгар көһөрө сылдьыбыттара.
Сэбиэскэй кэмҥэ бастыҥ үөрэхтээх, общественнай, пионерскай үлэҕэ көхтөөх оҕолор «Артекка» сынньанар чиэскэ тиксэллэрэ. Кинилэри кытары тас дойдуттан эмиэ ыҥырыллан сынньаналлара, умнуллубат күннэрин Крым кытылыгар атаараллара.
Билигин да «Артек» араас дойду оҕолоругар аана аһаҕас. Үөрүөхпүт иһин, Саха сириттэн үгүстүк сынньаналлар. Ону эрэдээксийэ почтатыгар кэлэр суруктар, хаартыскалар да туоһулууллар.
Балаҕан ыйын 25 – алтынньы 25 күннэригэр «Артекка» эдэр дипломаттар норуоттар икки ардыларынааҕы сменалара ситиһиилээхтик үлэлээтэ. Онно «Хрустальный» диэн лааҕырга 338 оҕо Россия 44 регионуттан «Россия уонна аан дойду норуоттарын остуоруйалара оҕолор харахтарынан» диэн ойуулуур-дьүһүннүүр куонкурус кыайыылаахтара уонна эдэр дипломаттар сынньаннылар. Олор истэригэр Саха сириттэн хотугу улуус оҕолоро – Анаабыртан «Тэбэй» ансаамбыл (сал. Саргылаана Туприна) уонна «Будущий дипломат» куонкурус кыттыылаахтара Лев Неустроев (Ньурба А.Н. Чусовской аатынан техническэй лиссиэйэ), Валерий Корякин (Бүлүү И.Л. Кондаков аатынан гимназията), Ньургун Пермяков (Чурапчы С.К. Макаров аатынан гимназията), Байдам Михайлов, Артем Соловьев (иккиэн Дьокуускайтан, В.П. Ларионов аатынан ФТЛ) бааллара.
Сменаны быйыл Саха сиригэр ыалдьыттаабыт Боломуочуйалаах посол, Россия дипломаттарын ассоциациятын бэрэссэдээтэлин солбуйааччы Валерий ЕГОШКИН салайбыта. Дипломаттар, посоллар, биллиилээх учуонайдар, норуоттар икки ардыларынааҕы сыһыаннаһыыларга идэтийбит дьон оҕолорго туһалаах лиэксийэлэри аахпыттара, билиилэрин-көрүүлэрин үллэстибиттэрэ. Күн аайы кэриэтэ квестэр, куонкурустар, спортивнай оонньуулар, күрэхтэһиилэр ыытыллыбыттара.
«Артекка» эдэр дипломаттар сменаларыгар сынньаммыт оҕолор үөрүүлэрэ улахан.
Байдам МИХАЙЛОВ, VIII «А» кылаас, В.П. Ларионов аатынан ФТЛ:
– Учууталбыт Ирина Прокопьевна Петрова Карл Поппер киэбинэн «Дебат» оонньууларын сүрдээх үчүгэйдик ыытааччы. Таганрог куоракка Чехов аатынан турнирга дебакка кытта сылдьан, дипломатия эйгэтин сэҥээрбитим. Онон быйыл «Будущий дипломат» куонкурус өрөспүүбүлүкэтээҕи түһүмэҕэр кыттан, кыралар лигаларыгар II миэстэ буолбутум. Онтон сайын эссе куонкуруһугар кыттан, «Артекка» сылдьар чиэскэ тигистим. Саха сириттэн 5 дипломат, 11 уруһуйдьут оҕо буолан сынньанныбыт. Биһиги, эдэр дипломаттар, «Хрустальный» диэн олус үчүгэй архитектуралаах лааҕырга олордубут. Космонавт Юрий Гагарин сырдык аатыгар тутуллубут эбит. Александр II дыбарыас-мусуойугар, космонавтика, Чехов мусуойдарыгар сырыттыбыт. Сменабыт бүтүүтүгэр «Алжир остуоруйалара» диэн кинигэни хомуйан оҥорбут Валерий Егошкин биһиэхэ илии баттаан кинигэтин бэлэхтээбитэ. Маннык үчүгэй айаны бэлэхтээбит Россия Тас дойдулар дьыалаларыгар министиэристибэтин Саха сиринээҕи бэрэстэбиитэлистибэтигэр, чуолаан Н.В. Дьяконовка, «Юные якутяне» тирэх киин эппиэттээх үлэһитэ Я.Д. Поскачинаҕа, учууталбар И.П. Петроваҕа махтанабын.
Дайаана ГОВОРОВА, IX кылаас, Анаабыр улууһун гимназията:
– Крым уонна Хара муора кэрэтин көрөн, олус астынным, кэрэхсээтим. «Саха сирин норуоттарын остуоруйата» диэн кинигэни оҥорууга кыттыбыппыттан үөрдүм. Биһиги баай култууралаахпыт, ону атын норуоттар билиэхтээхтэр дии саныыбын. Ол кинигэни оҥорууга уруһуйдьут оҕолор миигин ойуулаабыттара. Ону кэтээн көрөр эмиэ олус интэриэһинэй этэ. Кинилэр биһиги төрүт таҥаспытын, оһуорбут-мандарбыт ис хоһоонун, суолтатын олус сэргээтилэр, элбэҕи ыйыталастылар. «Артекка» сылдьыбыппын хаһан да умнуом суоҕа.
Жанна ЛЕОНТЬЕВА.