Олохпут күн-түүн киһи күүппэтэх өттүттэн араас быһылааннары, соһуччу сонуннары аҕала турар. Тэлэбиисэринэн көрөр катастрофа жанрдаах киинэҕэ курдук, аан дойду куораттарын уулуссалара иччитэхсийдилэр. Улахан дьон үлэлэригэр тиэтэйэ-саарайа барбат, оҕолор оскуолаларыгар үөрэ-көтө дьиэрэҥкэй тэбэн сүүрбэт буоллулар.Ол эрээри Интернет, саҥа технологиялар, көмпүүтэр ыал аайы баар буолан, олох салҕанар, үлэ, үөрэх тохтообот.
Маннык быыс кэмҥэ олус наадалаах идэлээх дьонунан IT эйгэтин үлэһиттэрэ буолаллар. Дьокуускай 23 №-дээх оскуолатын оҕолоро бу идэ туһунан туох санаалаахтарын учуутал Вера Святославовна Гаврильева билиһиннэрэр.
Арсен Петров, 9 кылаас:
— Мин санаабар, билиҥҥи кэмҥэ АйТи олус наадалаах. Биһиги саҥа технология үйэтигэр олоробут. Билигин дьон бары көмпүүтэрдээхтэр,смартфоннаах. Дьон аны төлөпүөнэ суох кыайан олорбото да буолуо. АйТи идэтэ саамай наадалаах буолан турар. Саҥа көлүөнэ оҕолоро бары программист буолуохтарын уонна АйТи эйгэтигэр үлэлиэхтэрин баҕараллар.
Бу эпидемия ыарахан бириэмэтигэр бары дьиэҕэ олорон үлэлииллэр, үөрэнэллэр. Дьон дьиэлэриттэн үлэлииллэригэр, үөрэнэллэригэр анаан күн аайы араас саҥа бырагыраама тахсан, дьон олоҕун чэпчэтэр. АйТи улэ, мин санаабар, олус интэриэһинэй. Санааҥ көрүҥ: биир кнопканы баттаан, элбэх араас дьайыыны оҥоруоххун сөп!
Вилияна Васильева, 9 кылаас:
— Кэм кэрдиитинэн олох сайыннаҕын аайы, саҥа идэлэр баар буолан иһэллэр. Билиҥҥи, цифровой технология сайдан турар кэмигэр, саҥа идэлэр: АйТи технология инженерэ, оператор, 3Д моделирование инженерэ, көмпүүтэр оонньууларын, анимация (мультик) оҥорор программист, о.д.а. олус наадалаахтар. Саҥа технологиялар сайдан истэхтэрин аайы, араас идэлэр баар буолан иһэллэр.Холобур, программист көмпүүтэр бырагырааматын суруйар, араас коду айар, суруйар. Кини үлэтэ айымньылаах — таһаарыылаах. Үчүгэй программист көмпүүтэр араас бырагырааматын, тылларын быһаарар, үөрэтэр. Тестировщик идэлээх киһи программист айбыт бырагырааматын бэрэбиэркэлиир, сыыһатын быһаарар. Системнай администратор көмпүүтэрдэри ситимҥэ холбоон биэрэр. Системнай архитектор саҥа бырагыраама оҥоһуллар суолун ыйан -кэрдэн биэриэхтээх. АйТи технология тупсан, сайдан истэҕин аайы, олох эмиэ сайдыахтаах, чэпчиэхтээх. Аныгы үйэ киһитэ аныгы идэлэри талан, бар-дьон олоҕун чэпчэтэргэ, туһаны аҕаларга кыһаллыахтаах.