Доруобуйаларынан хаарчахтаах, ол гынан баран күүстээх санаалаах, олоххо дьулуурдаах дьон биһиги ортобутугар баалларын билэ-көрө сылдьабыт.
Мөлтөхтүк көрөр дьоҥҥо «Белая трость» диэн кинилэри кытта биир санааланыы, көмөлөһүү күнэ баар.
Нэһилиэкпит библиотекатыгар бу күҥҥэ аналлаах «Мир един» медиа-урок ыытылынна. Библиотекарь Яна Октябровна Борисова 7-8 кылаас үөрэнээччилэригэр Брайль алфавитын билиһиннэрдэ. Бу «аптаах алта туочуканан» биһиги, көрбөккө олорон, нууччалыы тыллары ааҕан көрдүбүт. Маны тэҥэ «Саҥарар кинигэни» иһиттибит.
Онтон тиффлобыһаарыылаах «Снайпер саха» киинэттэн быһа тардыыны көрдүбүт. Бүгүн элбэҕи биллибит-көрдүбүт. Харахтарынан мөлтөхтүк көрөр дьон күннээҕи олохторугар көрсөр моһоллорун эрдээхтик тулуйан, үөрэ-көтө инникигэ эрэллээхтик хардыылыыр күүстээх санааларын сөҕө санаатыбыт, бу тула кэпсэттибит.
Маннык тэрээһиннэр тулабытыгар баар дьону, кинилэр кыһалҕаларын өйдүүргэ, олоҕу сыаналыырга үөрэтэллэр диэн өйдүүбүт.
Саша ИВАНОВА, 7 кылаас.
Дүллүкү, Үөһээ Бүлүү, «Эрчим» корпост.