Алтынньыга Саха республикатыгар Ийэ күнүттэн саҕалаан сэтинньигэ Россияҕа бэлиэтэнэр Ийэ күнүгэр дылы Г.Г. Софронов аатынан Өлөөкө-Күөл орто оскуолатыгар Ийэ күнүгэр аналлаах декада саҕаланна. Бу кэмҥэ күн-күбэй ийэлэрбитигэр аналлаах кылаас чаастар, уруһуй быыстапката, Ийэ кыыһынаан тикпит сыттыгын быыстапка-куонкуруһа, үөрэнээччилэр ийэлэригэр анаабыт өйтөн суруйууларын күрэҕэ, кылаастарга «Биһиги ийэбит» диэн видеоролик куонкуруһа уонна кылаастарынан ийэлэргэ аналлаах араас тэрээһиннэр ыытыллыахтара.
Ол курдук, сыттык быыстапкатыгар 26 араас сыттык кэлэн кэчигирээтэ. Манна араас быһыылаах-таһаалаах, араас матырыйаалтан оҥоһуллубут, киэргэтиллибит, араас кээмэйдээх сыттыктары бэркэ сэргии көрдүбүт. Куонкурус аата «Мин таптыыр сыттыгым» диэн этэ. Кырдьык да киһи эрэ кууһа сытыах курдук, сымнаҕас, тупсаҕай, ураты сыттыктары ийэлэрбит кыргыттарынаан тикпиттэрин биһирээтибит да, сөхтүбүт да.
Кылаас бырааһынньыктарыттан бастакынан 7-с кылаастар тэриннилэр. Кинилэр ийэлэриниин олохтоох кыраайы үөрэтэр түмэлгэ «Билэҕин дуо?» диэн квест-оонньууга күрэхтэстилэр. Оҕолор ийэлэриниин түмэл үлэһитэ Ю.С. Винокурова бэлэмнээбит 5 түһүмэхтээх сорудахтарын ылан, түмэл устун сылдьан бэриллибит бириэмэҕэ толордулар. Сонун оонньуу кыайыылаахтарынан Арылхан Винокуров ийэтинээн Елена Сергеевналыын буоллулар. Иккис миэстэни Игнат Винокуров ийэтиниин Вера Петровналыын ыллылар. Кинилэртэн аҕыйах очукуонан хаалан үһүс миэстэҕэ тигистилэр Денис Винокуров ийэтинээн Мария Николаевналыын. Кыайыылаахтар бары кылаас салайааччытын аатыттан Добун сурук, минньигэс бэлэх туттулар. Оҕолор күндү ийэлэригэр бэйэлэрэ оҥорбут сэмэй бэлэхтэрин туттардылар, эҕэрдэлэрин эттилэр.
Үлэлэриттэн, дьиэтээҕи түбүктэн быыс булан кэлэн күрэхтэһиигэ кыттан, ийэлэрбит олус сэргэхсийэн, үөрэн бардылар. Бу оонньууттан оҕолор да, ийэлэр да элбэҕи биллибит диэн күрэхтэһиини сөбүлээбиттэрин биллэрдилэр.
Мантан салгыы декада устата оҕолору ийэлэриниин сомоҕолуур араас интэриэһинэй тэрээһиннэр ыытыллыахтара диэн күүтэбит.
И. Ноговицына, Өлөөкө-Күөл б.