Ньурба улууһун С.П. Алексеев-Бооһуут аатынан Чаппанда орто оскуолатын иһинэн үлэлиир «Сатабыл» лааҕыр Бастыҥнар хамсааһыннара «Благо твори!» волонтердар хайысхаларын былаһааккатыгар бэйэтин үлэтин билиһиннэрдэ.
2027 сылга Ньурба оройуонугар IX Спортивнай оонньуулар ыытыллыахтара. Онтон Оонньуулар адаптивнай көрүҥнэрэ Чаппандаҕа ыытыллара былааннанар. Онон оскуола билиҥҥиттэн волонтердары бэлэмниир үлэни ситимнээхтик ыытар.
Чаппанда нэһилиэгэр «Развитие образования РС (Я) на 2020-2024 годы и на плановый период до 2026 года» госбырагыраама иһинэн тутуллубут саҥа оскуола былырыын ахсынньыга үлэҕэ кииртэ.
Иитии үлэтигэр дириэктэри солбуйааччы Сардаана Васильевна Бухолова лааҕыр үлэтин кэпсиир:
— Былырыын ахсынньы ыйга Өрөспүүбүлүкэбит Ил Дархана Айсен Николаев өйөөн икки этээстээх саҥа оскуолаҕа киирбиппит. Онон үөрүүбүт улахан. Оскуолабытыгар 76 оҕо үөрэнэр. Икки сыллааҕыта диэри тимуровецтар диэн ааттанар этибит. Онтон волонтерскай хамсааһын кэлбитигэр, ол хайысхатынан үлэлиибит. Онон быйылгы сайыҥҥы лааҕырбыт үлэтэ волонтерскай хамсааһын хайысхатынан ыытылынна.
Билэргит курдук, 2027 сылга Ньурба улууһугар IX Спортивнай оонньуулар ыытыллаллар. Онно биһиги волонтер оҕолорбутун бэлэмниэхтээхпит. Бу билигин волонтердуу сылдьар үөрэнээччилэрбит улахан кылааска таҕыстылар. Онон оскуолабыт 5, 6, 7 кылаас оҕолорун түөрт сылынан буолуохтаах өрөспүүбүлүкэтээҕи Спортивнай оонньууларга волонтердуурга бэлэмниир соругу туруордубут. Манна эттэххэ, Чаппанда нэһилиэгэр адаптивнай спорт көрүҥэр улахан спортивнай комплекс тутуллуохтаах. Онон 9-с Спортивнай оонньуулар адаптивнай көрүҥнэрэ биһиги нэһилиэккэ буолара былааннанар.
Чаппанда орто оскуолата «Кэскил» оҕо бэчээтин медиаоскуолаларын иһигэр баар, медиа-киини Сардаана Васильевна бэйэтэ салайар.
keskil14.ru