Биэс уонна алта хайаҕастаах флейта үс тыһыынча сыл анараа өттүгэр Кытайга оҥоһуллан муусука тэрилэ быһыытынан оонньонор буолбута биллэр. Кэлин Индияҕа, Японияҕа тэнийбитэ. Мин 2020 сылтан Үөһээ Бүлүүтээҕи Николай Иванович Бойлохов аатынан Оҕо ускуустубатын оскуолатын иһинэн тэриллибит флейта кылааһыгар, Марта Анатольевна Тоноева салалтатынан, такайыытынан үөрэнэ сылдьабын.
«Иэйиэхсит» оҕо бөлөҕөр сылдьабын. Быйыл саас, кулун тутарга, Бүлүү бөлөх улууһугар эдэр кэрэспэдьиэннэр сүлүөттэрэ ыытыллыбытыгар, Харбалаах, Тамалакаан оскуолатын үөрэнээччилэригэр остуоруйа кэпсии таарыйа, флейтэбинэн сахалыы матыыптары таһааран оҕолор, учууталлар сэҥээриилэрин ылбыппыттан үөрэбин. Маны таһынан Оҕо ускуустубатын оскуолата 2022-23 үөрэх сылын түмүктүүр кэнсиэригэр үрдүк таһымнаахтык кыттыбыппыт.
Инникитин флейтэҕэ оонньуур таһыммын үрдэтэр баҕа санаалаахпын.
Алина Габышева, «Иэйиэхсит» оҕо бөлөҕө, Ороһу, Үөһээ Бүлүү.