Биһиги оскуолабыт иһинэн 2021 сыллаахтан «Мир увлечений» («Эбии дьарык умсулҕана») республиканскай бырайыак куйаар ситимин нөҥүө ыытыллар. Бырайыак сүрүн идеятын оскуолабыт физика учуутала Раиса Черноградская толкуйдаабыта. Автордарынан биһиги, Дария Готовцева уонна Мария Васильева үлэлиибит.
2021 сыллаахха ыытыллыбыт күрэхпитин санатан аастаххына, «Мир увлечений – я коллекционер» диэн күрэх буолан ааспыта. Бу күрэххэ барыта холбоон Саха сирин араас муннуктарын 18 улууһуттан 125 кыттааччы кыттыыны ылбыта. Гран-при хаһаайынынан Уйгулаана Филиппова, Мэҥэ-Ханалас улууһун Павловскай орто оскуолатын 4 кылааһын үөрэнээччитэ буолбута, үлэтин аата «Триболеты» диэн дьикти тааһы мунньар эбит.
Быйыл бу бырайыакпыт иһинэн «Остуоруйаһыт оҕолор» диэн 2 республиканскай күрэх ыытылынна. Манна барыта холбоон 22 үлэ киирдэ. Ол курдук, Сахабыт Сирин араас муннуктарыгар олорор талааннаах да оҕолор баалларын сөҕө көрдүбүт.
Ити курдук хас биирдии күрэххэ ким эрэ син-биир кыайыылаах үрдүк аатын сүгэр. Быйылгы кыайыылаах Кубок Дьокуускай куорат 2 нүөмэрдээх Национальнай политехническэй орто оскуолатыгар, фольклор салаатын үөрэнээччилэригэр барда. Кыайыылаахтар үөрүүлэрэ муҥура суох. Маннык курдук кулун тутар ыйга «Көрдөөх оҕолор» диэн конкурс бырайыакпыт иһинэн ыытыллара былааннанар. Хас биирдии оҕо талааннаах дии саныыбын. Оҕо талаанын арыйар маннык бырайыак баарыттан үөрэбин. Ол курдук, оҕо талаанын арыйан бу күрэхпитин өссө да өр сылларга салҕыахпыт диэн эрэнэбит!
Хаҥалас улууһун, Хоточчу ситэтэ суох орто оскуолата.