Былыр-былыргыттан саха тыаны кэрийэ сылдьан, бултаан-алтаан, куруук өттүк харалаах сылдьар. Онно кини бэриниилээх доҕоро ыт буолар. Сөптөөх иитиигэ, ыт киһиэхэ бастыҥ көмөлөһөөччү, харабыл буолуон сөп. Оннооҕор киһиэхэ көмө буоларга тус анабыллаах ыттар бааллар, холобур: өрүһүйээччи, хараҕа суох киһиэхэ сирдьит, бостуук, булчут уо.д.а.
Биһиги дьиэ кэргэн эрэллээх доҕорбут Шарик диэн ааттаах атыыр ыт. Кинини 1 ыйдааҕар Уус-Алдан оройуонуттан ылан, Ньурбаҕа аҕалбыппыт. Шарик кулун тутар 16 күнүгэр 2021 сыллаахха төрөөбүтэ. Боруодатынан лабрадор. Кини олус сымнаҕас уонна өйдөөх. Биһигини, оҕолору, кытары оонньуурун олус сөбүлүүр.
Шарик сааскы уонна күһүҥҥү кус булдун кэмигэр ууттан кустары таһааран аҕабар көмөлөһөр. Кыһыҥҥы тымныы күннэргэ соҕурууҥу тоҥуй боруода буолан дьиэҕэ сытар. Таһырдьа тиэргэн иһигэр көччүйэн, кэлбитин ааны тонсуйан биллэрэр идэлээх. Халлаан сылааһыгар таһырдьа бааллан сытар. Биһиги хамаандабытын барытын истэр, бэл, дорооболостоххо, илин атаҕын биэрэн дорооболоһор.
Ыппытын үчүгэйдик көрөбүт-харайабыт. Бириэмэнэн күҥҥэ үстэ аһатабыт. Кини биһиги дьиэ кэргэн толору тутаах чилиэнэ буолар.
Биһиги ыппытын олус таптыыбыт, кини биһиги эрэллээх доҕорбут буолар!
Анатолий Григорьев, «Ыллык» эдкорпост, Ньурба, Хаҥалас.