Анаабыр улууһун киинигэр Сааскылаахха баар «Алмаз» норуот айымньытын дьиэтигэр киирдэххинэ, ыраах хоту сылдьаргын умнан кэбиһэҕин. Оннук ураты, сырдык, аныгылыы тутуулаах, алмаастыы күлүмүрдүү турар дьиэ.
Ханнык кэнсиэргэ, тэрээһиҥҥэ сылдьыаххын баҕарар билиэккин эрдэттэн онлайн-терминалынан холкутук атыылаһыаххын сөп.
Култуура дьиэтин хайа баҕарар муннугар олорон кинигэ, сурунаал көрүөххүн сөп. Спортсаалаҕа киирэн эрчиллэн тахсыаххын син. Иккис этээскэ баар оройуон библэтиэкэтигэр кинигэ, сурунаал ааҕыаххын сөп. Төрөппүттэр оҕолорун кытта «Осикта» оҕо бибилэтиэкэтигэр хайаан да сылдьаллар. Робот-бибилэтиэкэлэри кытта кэпсэтэллэрин, санаа атастаһалларын ордук сэргииллэр. Күн аайы манна 30-ча оҕо сөбүлээн мустар.
Оройуон бибилэтиэкэтигэр биһиги сурунаалларбыт, хаһыаттарбыт барыта тэлгэнэн сыталлар. Ахсынньы ыйдааҕы нүөмэрдэрбит Сааскылаахха бэйэбит иннинэ тиийэн, тиэрдиллибиттэрин көрөн сөхтүбүт даҕаны, үөрдүбүт даҕаны.
– Аныгы кэм ирдэбилигэр сөптөөх усулуобуйаны тэрийдэххинэ, бибилэтиэкэҕэ дьон умсугуйан туран сылдьар. Ону тэрийэргэ Грантовай үлэ кыаҕын-күүһүн туһанабыт. Грантовай үлэ нөҥүө тугу баҕарбыккын олоххо киллэрэргэ толору кыах бэриллэр, – диэн кэпсиир оройуоннааҕы бибилэтиэкэ салайааччыта Марфа Алексеевна Боярская.
Анаабыр бибилэтиэкэтэ ааҕааччыларыгар, дьонугар-сэргэтигэр аныгы кэм ирдэбилигэр толору эппиэттиир усулуобуйатын тэрийиитэ – Граннарга көхтөөхтүк кыттыытын түмүгэ. 2021 сыллаахха бибилэтиэкэ коллектива «Култуура» национальнай бырайыак граныгар кыайан 10 мөл. ылары ситиспитэ. Эмиэ бу сыл Президент В.В. Путин култуурунай инициативатын фондатын Граныгар кыайан, 478 тыһ. солк. ылбыта. Ол түмүгэр бу маннык аныгы кэм бибилиэтиэкэтин оҥорон таһаарбыттар. Бибилэтиэкэ хас биирдии муннугар илии сылааһа сыстыбыта тута биллэр. Онтон сылаас эйгэ баар сиригэр киһи, ордук оҕо аймах, үөрүүнэн тардыһар.
Киин улуустар, тыа сирин бибилэтиэкэлэрэ Грантовай үлэни хайдах кыайа тутуохха уонна туһаныахха сөбүн туһунан Анаабырдары кытта уопут атастаһыытыгар күүскэ үлэлэһиэххитин, сүбэ-соргу ылыаххытын сөп. Сигэнэр ссылкаҕыт: https://vk.com/public217464975
Төһөнөн хоту киирэн иһэҕин да соччонон дьон өйө-санаата сырдык, кэрэҕэ, сырдыкка тардыһыыта күүстээх, саҥаны, сонуну айан-тутан таһаарар кыаҕа улахан. Хоту сир киһиэхэ биэрэр күүһүн, кыаҕын үлэҕитигэр туһаныҥ!
Сардаана МАТВЕЕВА