Быйыл таптыыр суруйааччыбыт Т.Е. Сметанин 103 сылын туолла. Биһиги кылаас сыл аайы сэтинньигэ кылааспытыгар Т. Сметанин нэдиэлэтин ыытабыт.
Тимофей Сметанин оҕо сылдьан бастыҥ үөрэнээччи, үчүгэй ахсаанньыт, барыга бары олус көхтөөх үөрэнээччи этэ. Бу нэдиэлэҕэ учууталбыт Саргылана Семеновна уонна төрөппүттэрбит араас тэрээһиннэри ыыталлар. Холобура: «Бастыҥ суотчут», «Мындыр ахсаанньыт», «Ыраас буочар», «Быһыйа оонньуулара», айымньыларын ааҕыы, викторина уо.д.а.
Сэтинньи 25 күнүгэр сыл аайы бөһүөлэкпит устун «Кэбээйигэ Т. Е. Сметанин бэлиэ миэстэлэрэ» диэн темалаах экскурсияҕа сылдьааччыбыт. Кэрэ Эйгэ оскуолатыгар, Т. Сметанин памятнигар, Т. Сметанин аатынан народнай театрга, олохтоох библиотекаҕа, музейга сылдьабыт.
Хамсык кэлбит кэмигэр 2020, 2021 сылларга Т. Сметанин бииргэ төрөөбүт балтыгар Екатерина Егоровнаҕа сурук суруйан дьиэтигэр тиийэн, тэйиччи тураммыт эҕэрдэлээччибит, сурукпутун туттарааччыбыт. Быйыл эмиэ эбээбитигэр Екатерина Егоровнаҕа, сурук суруйан, убайын төрөөбүт күнүнэн эҕэрдэлээбиппит. Екатерина Егоровна сыл аайы биһигини күүтэр, тиийдэхпитинэ олус үөрэр, ,,Тима Сметанин курдук үөрэхтээх, үтүө дьон буола улаатыҥ», — диир.
Алина Каратаева, 4-а кылаас, Кэбээйи орто оскуолата.