Сайдыс
Мин устудьуоннуур сылларбыттан саҕалаан, тэттик киинэлэри устар дьарыктаахпын. Хайдах саҕалаабытым туһунан кылгастык кэпсиим.
«Canon» 500D диэн хаартыскаҕа түһэрэр аппарааттаах этим. Онтукабынан видеоҕа уста-уста, көмпүүтэргэ киллэрэн, “Vegas 9” диэн бэрт чэпчэки, киһиэхэ өйдөнөр бырагырааманан таҥарым. Кылгас, тэттик киинэлэри устууга, саамай уустуга киинэҥ жанрын талыы буолар.
Мин аан бастакы киинэм «Дэриэбинэ уола» диэн кэмиэдьийэ жанрдаах. Дьону кытта кэпсэппэт, бэйэтэ-бэйэтигэр сылдьар Дьокуускай куоракка саҥа кэлбит уол туһунан этэ. Оттон билигин саҥа тиэхиникэ сайдан, iPhone 6s төлөпүөҥҥэ “iMovie” диэн бырагырааманан уһуллум да, миэстэтигэр тутатына көннөрөн, таҥан баран, араас социальнай ситимнэргэ уган тарҕатабын.
Доҕоттор, кылгас киинэни устарга аан маҥнай былаан наада:
— Киинэбит ханнык жанрдаах буоларын быһаарабыт.
— Сценарий суруйабыт.
— Артыыстарбытын көрдүүбүт.
— Устар миэстэбитин быһаарсабыт.
— Аппарааттарбытын көрүнэбит (микрофон, подсветка, о.д.а.).
Бу курдук кыра былаантан киһи интэриэһин тардар киинэлэр тахсыахтарын сөп. Үчүгэй хаачыстыбаҕа устуоххун баҕарар буоллаххына, «GoPro Hero 5» экшн-камера ордук. Өссө үчүгэй киинэлэри устарга күөх халлаан үрдүнэн көтөр «dji mavic pro» диэн квадрокоптер наада.
Онон, билигин саҥа үйэ кэлэн, Инстаграм социальнай ситимҥэ кылгас, тэттик киинэҕин уктаххына, дьон сэргээтэҕинэ, тута аатырыаххын, биллиэххин сөп.
Иннокентий ВЛАДИМИРОВ.