Россия көрдөрүүлээх ансаамбылларын кэккэлэригэр киирбит А.Н. Окоемов аатынан «Мичээр» оҕо үҥкүү ансаамбылын иитиллээччилэрэ дойдубут тэбэр сүрэҕэ Москва куоракка сылын аайы ыытыллар норуоттар икки ардыларынааҕы “Ороһооспотооҕу сулустар” фестивальга ситиһиилээхтик кыттан, II степеннээх лауреат аатын ылан, кыайыы көтөллөнөн кэлбиппит. Уус-уран салайааччыбыт, СӨ култууратын туйгуна Татьяна Филипповна Филиппова биһигини илдьэ сылдьыбыта.
Онно Беларусь, Казахстан, Узбекистан, о.д.а. дойдулартан, Россия 90 куоратыттан барыта 2500 кыттааччы талаанын көрдөрбүтэ.
Тэрээһин үөрүүлээх аһыллыыта “Космос” улахан кэнсиэртиир саалаҕа буолбута. Ыраахтан-чугастан кэлбит ыалдьыттары биллиилээх ырыаһыт Полина Гагарина, Россия норуодунай худуоһунньуга, худуоһунньук-модельер Валентин Юдашкин, циркэ аатырбыт артыыстара ини-бии Запашнайдар эҕэрдэлээбиттэрэ. Шри-Ланка бөдөҥ куората Коломботтан «Lyceum» үҥкүү кэлэктиибэ кыттыбыта тэрээһини өссө киэргэппитэ.
Фестивалы биллиилээх танцмейстер Александра Аношкина биир тыынынан салайда. Муусука эрчимнээх доҕуһуолугар уйдаран, үгүс оҕо тэҥник киэҥ сааланы тула кулахачыйа эргийдэ.
СӨ култууратын үтүөлээх үлэһитэ, СӨ култууратын уонна үөрэҕириитин туйгуна, Нам улууһун бочуоттаах гражданина А.Н. Окоемов туруорбут “Маҥнайгы хаар” үҥкүүтүнэн кыттыбыппыт. Омукпутун, дойдубут тыынын, олоҕун-дьаһаҕын кэрэһилиир үҥкүүлэрбитигэр кэтэр таҥастарбытын төрөппүттэрбит, ансаамбылбыт уран тарбахтаах иистэнньэҥэ Анастасия Никифорова, “Алгыс” сынньалаҥ киинин үлэһитэ Анастасия Барашкова ыйан-кэрдэн, сиэдэрэйдээн тикпиттэрэ. Ол таҥастарбытын бука бары олус сэргээбиттэрин, биир-биир тутан-хабан, имэрийэн көрбүттэрин билигин саныахха астык.
Түгэнинэн туһанан, ийэлии сыһыанынан барыбытын илдьэ сылдьыбыт салайааччыбыт Татьяна Филипповаҕа, төрөппүттэрбит Розалия Петроваҕа, Мария Муксуноваҕа, уус-уран салайааччыбыт Ньургуйаана Ощепковаҕа, хореограф Эдуара Сергееваҕа уонна Алена Охлопковаҕа махталбытын биллэрэбит.
Кыра эрдэхпититтэн үҥкүү алыптаах эйгэтин кытта сөптөөхтүк алтыһа улааппыппытын дьэ итэҕэйдибит. Үҥкүү барыбытын бииргэ түмтэ, оҕо сааспыт умнуллубат түгэннэрин бэлэхтээтэ.
Иванна ПЕТРОВА,
VIII кылаас,
Д.Ф. Алексеев аатынан орто оскуола.
“Бастыҥ эдкор-2017” номинация кыайыылааҕа.
I Хомустаах, Нам.