Муус устар ыйга мин бүтүн Арассыыйатааҕы «Орлёнок» лааҕырга «Бастыҥнар хамсааһыннара» сменаҕа сылдьан олус диэн астынан кэллим. Дьиэбиттэн тэйэн айаннааһыным бастакы да буолбатаҕын иһин, бу ыраах, олох билбэт сирбэр тиийэрим уонна хаһан да көрбөтөх оҕолорбун кытта көрсөрбүн санаатахпына, олус долгутуулаах этэ. Ол да буоллар өй-санаа сайдарыгар туһалаах, наадалаах буолуохтааҕын өйдөөн бэйэбин уоскутуммутум.
Москванан Туапсеҕа тиийбиппит, лааҕырбыт онтон 45 биэрэстэлээх сиргэ турара. Ситэ уулла илик хаардаах сөрүүн Саха сириттэн тиийбит дьоҥҥо, айылҕата наһаа кэрэ этэ: күп-күөх араас эгэлгэ мастар, сибэккилээх газоннар. Ол да буоллар барыта сонун, атын, хайдах эрэ атыҥырыах санаа баара да, бэрт сотору бэйэм саастыылаах этэрээтим оҕолорун кытта билсэн, кэпсэтэн, онтон чэпчээн сылдьыбытым. Сменаҕа дойдубут араас куораттарыттан, уобаластарыттан, кыраайдарыттан оҕолор кэлбиттэр этэ, кинилэри кытта кэпсэтэн олохторун, интэриэстэрин, култуураларын уонна үгэстэрин туһунан элбэҕи биллим.
Лааҕырга хас биирдии күн бэйэ-бэйэтигэр майгыннаспат гына тэриллэрэ. Биһиги үксүн этэрээтинэн араас тэрээһиннэргэ кыттыбыппыт: маастар-кылаастарга, хамаанданан оонньууларга уонна көрсүһүүлэргэ. Ону таһынан араас бырайыактары оҥоруу туһунан, лидер диэн хайдах буолуохтааҕын, хамаанданан үлэ ымпыктарын-чымпыктарын ырытыы, эдэр ыччат инникитин хайдах дьаһанан олоруохтааҕын ким хайдах өйдүүрүн туһунан олус интэриэһинэй кэпсэтиилэр ааспыттара. Ол быыһыгар көннөрү күннэргэ оскуолаҕа үөрэммиппит, эксээмэннэргэ бэлэмниир, барбыт матырыйааллары хатылатар этилэр. Өссө успуорт-чаастар бэрт интэриэһинэйдик ыытыллаллара, онно бассейыҥҥа, скалодромҥа, успуорт саалыгар эрчиллэрбит.
Мин бу лааҕырга саамай сөбүлээбитим кини тулалыыр эйгэтэ. Араас сирдэртэн кэлбит дьон диэтэххэ, оҕолор бэйэ-бэйэлэригэр сыһыаннара наһаа истиҥ, боростуой, омугуттан тутулуга суох, бука бары өйдөһөн, көмөлөсүһэн, кылгас да кэм иһигэр бары доҕордоһон, чугастыы буолбуппут. Ордук бары өйдөөн хаалбыт тэрээһиннэрбитинэн киэһэ лааҕыр оҕото барыта мунньустан ыытар араас оонньуулар, кэнсиэрдэр, испэктээкиллэр, олорго бүттүүн этэрээтинэн бэлэмнэнии, сүбэлэһии, бииртэн биир үчүгэй идиэйэлэр… Бу түгэннэргэ дьэ өйдүүгүн, хайдахтаах курдук далааһыннаах үлэ ыытылларын, төһөлөөх элбэх оҕо сылы эргиччи маннык лааҕырдарга сынньанан билиитэ-көрүүтэ хаҥыырын, өйө-санаата сайдарын. Уонна дойдубут Бэрэсидьиэнэ Владимир Путин быйылгы сылы Арассыыйаҕа Норуоттар сомоҕолоһууларын сылынан биллэрбитин, араас тыллаах-өстөөх, дьүһүннээх оҕолор ортолоругар тэбис-тэҥҥэ үөрэ-көтө, ыллыы-туойа сылдьан, олус сөптөөх быһаарыныы эбит диэн санаан ылаҕын.
Мин муораны уонна ол дойду айылҕатын олус сөбүлээтим: сып-сылаас, тулаҥ күп-күөх, көрүөхтэн дьикти пальмалар уонна сип-сибиэһэй салгын. Ардыгар тэрээһиннэр кэннилэриттэн таах күүлэйдээччибит, кэпсэтэ-кэпсэтэ. Оҕолор бэйэлэрин дойдуларын, олорор сирдэрин, оскуолаларын, учууталларын, бииргэ үөрэнэр табаарыстарын, төрөппүттэрин тустарынан кэпсээннэрэ истэргэ олус интэриэһинэй, ол быыһыгар көрүдьүөс кэпсээннэр, анекдоттар, инники олох туһунан киһини толкуйдатар араас санаалар, анаарыылар барыта бааллара.
Бу лааҕырга сылдьыым миэхэ элбэҕи биэрдэ: саҥа билсиһиилэри, саҥаны бэйэҕэ арыйыыны, бэйэҕэр эрэллээх буолууну, дьону кытта кэпсэтэргэ уонна хамаандаҕа үлэлииргэ. «Орлёнок» итини таһынан миэхэ саамай сырдык, үчүгэй өйдөбүлү хаалларда, олоҕум биир чаҕылхай түгэнэ буолла. Ордук «Бастыҥнар хамсааһыннара» диэн сменаҕа түбэспиппиттэн астынабын, ити сүүнэ хамсааһын биир чилиэнэ буолбуппунан киэн туттабын!
Айсена Брызгалова, Дьокуускай к. 1 №дээх оскуолатын 10 кылааһын үөрэнээччитэ.
Кэскил14.ру