Сааскы сынньалаҥмар Дьокуускай куорат 2 №-дээх оскуолатыгар Георгий Евдокимович Бессоновка анаммыт XIII төгүлүн ыытыллар өрөспүүбүлүкэтээҕи «Бессонов ааҕыылара» научнай-практическай кэмпириэнсийэҕэ кытынным.
Георгий Евдокимович Бессонов — диэн Социалистическай Үлэ Геройа, РСФСР, САССР оскуолаларын үтүөлээх учуутала, САССР норуотун хаһаайыстыбатын үтүөлээх үлэһитэ, ССРС үөрэҕириитин туйгуна буолар.
Быйыл кэмпириэнсийэҕэ өрөспүүбүлүкэбит араас муннугуттан барыта 90 кыттааччы хас да хайысхаҕа арахсан, научнай дакылааттарын аахтылар. Оҕуруот үүнээйитин, хортуоппуйу дэлэтэр ньыманы, почваны чинчийээччилэр, отон култууратын, сибэкки араас көрүҥүн үөрэтээччилэр бааллара.
Мин бэйэм секциябар 13 оҕо бэйэтин научнай үлэтин, чинчийиитин билиһиннэрэр кыахтаммыта.
Чинчийэр тиэмэм — хортуоска араас көрүҥнэрин чинчийии. Дакылааппын аахпытым кэннэ, дьүүллүүр бөлөх (экспертнай комиссия) элбэх, дириҥ ыйытыылары биэрбитэ. Мин бары ыйытыыларга чопчу хоруйдары биэрбитим.
Салайааччым Максимова Зоя Владимировна бу научнай-практическай кэмпириэнсийэҕэ бэлэмнэнэрбэр, үлэбин наука өттүнэн чочуйарга олус көмөлөстө. Ол түмүгэр, бастакы миэстэҕэ тигистим уонна күрэс тэрийээччилэрэ Бессоновтар дьиэ кэргэттэриттэн Анал бирииһи ылан үөрдүм.
Маны таҺынан, Кэбээйи орто оскуолатын 9-с кылааһын үөрэнээччитэ Люба Максимова эмиэ ситиһиилээхтик кыттан, үһүс миэстэҕэ тигистэ.
Түмүкпэр салайааччыларбар, Слепцова Софья Прокопьевнаҕа уонна Максимова Зоя Владимировнаҕа, бу ситиһии кэлэригэр үтүө үлэлэринэн, сылаас сыһыаннарынан, улахан өйөбүллэрин иһин улахан махталбын тиэрдэбин!
Марина ПОПОВА, VII кылаас
«Дьоҕур» медиакиин, Кэбээйи орто оскуолата