Чурапчы улууһун ыччатыгар анаммыт «Басхан» күрэх Чурапчы гимназиятыгар буолан ааста. Бу күрэххэ үрдүкү кылаас уолаттара өйдөрүн-санааларын, сатабылларын тургутан, кэлэр кэскилбит лидердэрэ буоларга бэлэмнэрин көрдөрдүлэр. Күрэхтэһиигэ 11 уол кыттаммыт биэс түһүмэҕи аастыбыт.
Ырытыы: Түһүмэхтэринэн хайдах кыттынным?
«Удьуор утумун кытта билсиһии» бастакы түһүмэххэ бэйэм төрдүбүн-ууспун, дьиэ кэргэним устуоруйатын туһунан үчүгэйдик кэпсээтим дии саныыбын. Бу төрүт билиилэрбитин көрдөрөр үчүгэй түгэн этэ. «Норуот лидердэрэ» иккис түһүмэххэ миэхэ саха норуотун тумус туттар киһитэ Алексей Елисеевич Кулаковскай-Өксөкүлээх Өлөксөй түбэспитэ. Ыксалтан сылтаан кылгас баҕайытык эппиэттээтим. Өссө ааҕыахпын, билиибин кэҥэтиэхпин наада эбит.
«Дэриэбнэҕэ олоруу үтүөтэ» үһүс түһүмэххэ «Дэриэбинэҕэ олорор туох үчүгэйдээҕий?» диэн ыйытыыга хоруйдаатыбыт. Мин бу хоруйга эппиэттиэм иннинэ Алексей Андреевич Иванов-Күндэ «Кии сыта» хоһоонун аахтым. Тоҕо диэтэххэ, түптэ сыта тыа сирин тыынын, дьиэ кэргэн сылааһын биэрэр. Бу хоһоонунан саҕалаабытым олус табыгастаах этэ уонна үчүгэйдик эппиэттээтим дии саныыбын.
Төрдүс түһүмэх «Сытыы ыйытыылар» соһуччу ыйытыылардаах. Бэлэмэ суох буолан сатаан кыайан эппиэттээбэтим. Кэлин өйдөөбүппүнэн, бу түһүмэх билиини эрэ буолбакка, түргэнник толкуйдуур дьоҕуру тургутар эбит.
«Хоһоону ситэрии» бэһис бүтэһик түһүмэххэ хоһоон тылларын ситэрэн биэрии сорудахтаах. Ис хоһоонун өйдүүр буоламмын, үчүгэйдик ситэрэн, сааһылаан биэрдим.
Күрэх түмүгэ уонна инники былааннар
Күрэх түмүгүнэн хас даҕаны уолга анал ааттар бэриллибиттэрин иһитиннэрдилэр. Мин оскуолам аатыттан анал номинация ыллым. Муҥутуур кыайыылаах аатын С.К. Макаров аатынан Чурапчы гимназиятын Х кылааһын үөрэнээччитэ Андрей Михайлов ылла. В.С. Яковлев-Далан аатынан Кытаанах орто оскуолатын Х кылааһын үөрэнээччитэ Арылхан Пономарев иккис, Г.П. Башарин аатынан Сылаҥ орто оскуолатын Х кылааһын үөрэнээччитэ Анатолий Протодьяконов үһүс миэстэ буоллулар.
Бу күрэхтэһии ыччат өйүн-санаатын сайыннарар, лидерскэй хаачыстыбаларын арыйар улахан суолталааҕын бэлиэтиибин. Кыайыылаах уолаттары эҕэрдэлиибин! Инникитин даҕаны маннык тэрээһиннэргэ кыттыаххайыҥ.
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы