Арассыыйа — элбэх норуот түмсэн олорор дойдута. Онон, 2026 сыл дойдубутугар норуоттар сомоҕолоһууларын сылынан биллэриллибитэ. Бу дириҥ ис хоһоонноох, бэйэ-бэйэни өйөһүү, доҕордуу сыһыаны күүһүрдүү, атын омук култууратыгар убаастабылы, дойдуһа киһини иитии бэлиэтэ буолар. Биһиги Улуу дойду араас оҕолоро буоламмыт, кыра эрдэхпититтэн араас омугу кытта алтыһа үөрэнэбит. Ол курдук, бүгүн «Чуораанчык» сурунаал ааҕааччылара атын омук доҕотторун туһунан кэпсииллэр.
Мин доҕорум Али
Мин доҕорум аата Али. Биһиги Москва куоракка билсибиппит. Кини омуга – узбек, ол эрээри кини Москваҕа төрөөбүт уонна онно олорор. Али узбектыы уонна нууччалыы холкутук саҥарар. Кулун тутар 21 күнүгэр узбектар Навруз диэн Саҥа дьылы уонна саас күн уһаабытын бэлиэтиир саамай сырдык, улахан бырааһынньыктаахтар эбит. Бу күн кинилэр 7 араас бүлүүдэ астыыллар.
Биһиги Алины кытта олус үчүгэйдик доҕордоспуппут, оонньообуппут. Сүтэрсибэт туһуттан төлөпүөммүт нүөмэрдэрин бэрсибиппит. Билигин куруук кэпсэтэбит. Мин Москваҕа өссө тиийдэхпинэ, көрсүөхпут диэн болдьоспуппут. Ити курдук, атын омук доҕордоох буоламмын, узбектар тустарынан элбэҕи билэбин. Кинилэр олус күүстэх санаалаах норуот.
Леонид Петров, III «А» кылаас, Оҕо айымньытын дыбарыаһа, Дьокуускай.
Умар уонна мин — тустууктарбыт
Үтүө күнүнэн! Мин аатым Влад Беляев. А.Г. уонна Н.К. Чирээйэптэр ааттарынан Дьокуускай куорат национальнай гимназиятыгар үөрэнэбин. Бииргэ төрөөбүт түөрт уолаттарбыт. Бары тустуунан сөбүлээн дьарыктанабыт. Элбэх күрэхтэргэ кыттабыт, элбэх доҕордонобут.
Ол курдук, мин биир чугас доҕорум Умар Исманов буолар. Кини Кыргызстантан сылдьар. Биһиги тустууга күн аайы бииргэ дьарыктанабыт.
Кыргызстан дьоно үтүө дьон. Тыллара, чыыһылалары ааҕыылара саха тылыгар олус майгынныыр.
Ким доҕордоох — ол дьоллоох.
Влад Беляев, II «А» кылаас, А.Г. уонна Н.К. Чирээйэптэр ааттарынан Дьокуускай куорат национальнай гимназията.
Алишердыын доҕордуубут
Мин доҕорум аата Алишер. Кини омугунан башкир. Биһиги Дьокуускай куорат 79 нүөмэрдээх «Лучик» оҕо саадыгар бииргэ сылдьыбыппыт. Доҕордоспуппут үс сыл кэриҥэ буолла. Биһиги Алишердыын оҕо саадыгар бириэмэбитин наар бииргэ атаарааччыбыт, группабытыгар бэрээдэги көрөөччүбүт, иитээччилэрбитигэр көмөлөһөөччүбүт. Оҕо саадын бүтэрэрбитигэр бэйэ-бэйэбитигэр өйдөбүнньүк курдук оонньуур бэлэхтэспиппит.
Билигин Алишер Дьокуускай куорат 17 нүөмэрдээх оскуолатыгар I кылааска үөрэнэ сылдьар. Төһө даҕаны араас оскуолаларга үөрэннэрбит, сибээспитин телефон нөҥүө тутабыт.
Ярослав Игнатьев, 1«Г» кылаас, 29 №-дээх оскуола, Дьокуускай.
Кэскил14.ру