Муус устар 29 күнүгэр Лөгөй лиссиэй интэринээтигэр үтүө үгэскэ кубулуйбут сандал сааһы, эйэ, үлэ бырааһынньыктарын уруйдуу көрсөр «Күөх Маай үҥкүүлүүр» диэн оскуола иһинээҕи үҥкүү бэстибээлэ лиссиэйбит аактабай саалатыгар ыытылынна.
Быйылгы күрэх Россияҕа норуоттар доҕордоһууларын, Саха Сиригэр култуура сылларыгар уонна Аан дойдуга үҥкүү күнүгэр ананна. Ол курдук, хас биирдии кылаас дойдубут араас норуоттар дьэрэкээн таҥастарын-саптарын симэнэн кэлбиттэрэ, үҥкүүнү олус киэргэттэ, көрөөччү хараҕын сөхтөрдө.
Кэнсиэр саҕаланыытыгар Аан дойдутааҕы үҥкүү күнүнэн хас биирдии кылаастан иккилии оҕо параадтаан киирдилэр, дойдубут өрөгөй ырыатынан саҕаланна. Уонна 5 кылаас үөрэнээччитэ Готовцева Вика ыллам ырыатынан көрөөччүлэри уонна оҕолору сандал сааскы «Эйэ! Маай! Үлэ! бырааһынньыгынан эҕэрдэ ырыатын бэлэхтээтэ.
Бэстибээл сүрүн сыала-соруга: оҕо кэрэни кэрэхсииригэр, кэрэ үнкүү култууратын билэригэр, кылаас оҕолоро бары бииргэ түмсэллэригэр үөрэтэр.
Дьүүллүүр сүбэнэн үлэлээтилэр: Петухова Татьяна Михайловна, Попова Марианна Фред уонна Петухова Евдокия Дмитриевна.
Кылаас коллективтара үҥкүүлэргэ ордук сөпкө уонна тэҥҥэ хамсаналларын, сыанаҕа туттуу-хаптыы култууратын уонна үҥкүү уопсай уруһуйун, ис хоһоонун көрдөрдүлэр.
Ол курдук, түмүккэ дьүүллүр сүбэ быһаарыыта:
Анал аат «Дебют года» 1 кылаас (кыл. сал. Олесова Н.С.) буолла,
«В Единстве — сила!» — 5 кылаас (кыл. сал. Старкова Е.М.) буолла;
«Счастье в дружбе» — 10 Б кылаас (кыл. сал. Бережнев А.А.)
«Приз зрительских симпатий» — 8 кылаас (кыл. сал. Колесова А.М..) Марианна, Куприян Поповтар дьиэ кэргэннэриттэн анал минньигэс бириис туттулар;
Диплом 3 ст. — 9Б кылаас (кыл. сал. Аммосова М.Г)
Диплом 2 ст. — 4 кылаас (кыл. сал. Нафанаилова В.Г)
Диплом 1 ст. — 7 кылаас (кыл. сал. Сысолятина А.М)
Лауреат 1 ст. — 10А кылаас (кыл. сал. Бурнашева Н.Е) 1000 солк.
Лауреат 2 ст. — 3 кылаас (кыл. сал. Кычкина А.Г) 1000 солк.
Лауреат 3 ст. — 6 кылаас (кыл. сал. Копырина А.Е) 1500 солк.
Лауреат лауретов — 9А кылаас (кыл. сал. Пахомава А.А) 2000 солк.
«Күөх маай үҥкүүлүүр-2026» үҥкүү бэстибээлин ГРАН-ПРИ хаһаайыттара — 8 кылаас коллектива (кыл. сал. Колесова А.М) буолары ситистилэр уонна 3000 солк. бириис туттулар.
Үҥкүү бырааһынньыгын түмүгэр хас биирдии кыттыбыт кылаас оҕолоро минньигэс сэмэй бэлэх тутан астынан тарҕастылар.
Бу үҥкүү күнүн бэстибээлин хас биирдии түгэнэ дойдубут норуоттарын доҕордоһууларын бэлиэтээн, саҥа култууралары уонна сонун ырыалары, үҥкүүлэри кытта билиһиннэрдэ.
Куруук бука бары эйэлээх халлаан анныгар олоруоҕуҥ! Бары үөрэнээччилэргэ Маай бырааһынньыктарынан эҕэрдэ! Төрөппүттэрбитигэр, көрөөччүлэргэ — истиҥ махтал!
Үҥкүүлээ! Үҥкүүлээ! Күөх Маай!
Үйэттэн үйэҕэ уруйдан!
Күөх Маай!
Янис СЫСОЛЯТИН,
Лөгөй лиссиэй-интэринээтин «SiTiM LegMedia» юнкора, Уус Алдан