Олунньу 19 күнүгэр гимназиябыт сыанатыгар С.С. Васильев-Борогонскай «Мөҕүрүүр бөҕө» диэн олоҥхотун 5 «А», «Б» кылаастар туруорууларыгар көрдүбүт. Бу тэрээһин кылаастар бырайыактыыр үлэлэрин уонна «Уруйдан, улуу олоҥхо!» Ийэ тыл, сурук-бичик нэдиэлэтин чэрчитинэн ыытылынна. 5-с кылаастар салайааччылара Сардаана Николаевна Гоголева, Кыдаана Михайловна Екечьямова ураты хайысханы тайанан, кинилэргэ саха тылын уонна литературатын учуутала Фекла Николаевна Болдовская, «Айылгы» норуот айымньытын дьиэтин фольклорга испэсэлииһэ Марианна Степановна Диодорова, «Дьиэрэҥкэй» оҕо народнай үҥкүү ансаамбылын салайааччыта Аси Куо Васильевна Ашеина күүс-көмө буоланнар, олоҥхо курдук сүдү айымньы дьон-сэргэ көрүүтүгэр-истиитигэр таҕыста.
Биһиги олоҥхону көрөн олус сөбүлээтибит. Оҕолор олус үчүгэйдик оонньоотулар. Оруолларыгар киирэн, дьиҥнээх артыыс курдук оонньооннор, бэртээхэй туруоруу буолла.
С.С. Васильев-Борогонскай «Мөҕүрүүр бөҕө» олоҥхотун көрөн баран, кимиэхэ туох санаа үөскээбитий? Ол туһунан көрөөччүлэртэн санааларын ыйыталастыбыт
https://vk.com/wall-199463452_32109
Анна Владиславовна Седалищева, 5 «Б» кылаас төрөппүтэ:
– Олоҥхону олус бэркэ туруорбуттар диэн көрдүм. Оҕолор наһаа үчүгэйдик оонньууллар эбит. Оруолларын көрөөччүгэ үчүгэй баҕайытык тириэртилэр.
Кыдана Михайловна Екечьямова, 5 «Б» кылаас салайааччыта:
– Саха оҕото төрүт үгэстэрин билиэхтээх дии саныыбын. Саха олоҥхото ЮНЕСКО-ҕа тиийэ аатыран шедевр быһыытынан билиниллэр. Ол иһин оҕолорбутун кыра саастарыттан олоҥхону биллиннэр диэн Фекла Николаевна, Сардана Николаевна буоламмыт хас биирдии оҕоҕо оруол биэрэн бу олоҥхону туруордубут. Аси Куо Васильевна, Марианна Степановна биһиэхэ наһаа көмөлөстүлэр. Табылынна дии саныыбын. Эһиил бу бырайыакпытын сайыннарыахпыт. Урукку выпусктарга «Тиэтэйбит» айымньынан спектакль туруора сылдьыбыппыт.
Альбина Ивановна Варламова, 5 «А» кылаас төрөппүтэ:
– Бүгүн гимназияҕа кэлэммин олуһун үөрэн турабын. Наһаа үчүгэй олоҥхо көрдүбүт. Оҕолорбут наһаа талааннаахтар эбит. Олоҥхо курдук уустук көрүҥү 5-с кылаас үөрэнээччилэрэ олус өйдөнүмтүөтүк, уобарастарын бэркэ арыйан, биһиэхэ сүрдээх үчүгэйдик бэлэх оҥордулар. Кылааспыт салайааччытыгар Сардаана Николаевнаҕа, Кыдана Михайловнаҕа, Фекла Николаевнаҕа махтаныахпын баҕарабын. Бу сүрдээх уопуттаах, биһиги гимназиябыт оҕолоругар саха тылыгар тапталы иҥэрэр учууталларбыт буолаллар.
Юрий Михайлович Слепцов, С.К. Макаров аатынан Чурапчы гимназиятын дириэктэрэ:
– Бүгүн «Мөҥүрүүр бөҕө» диэн олоҥхону 5-с кылаастар туруорууларыгар көрдүбүт. Оҕолор сүрдээх үчүгэйдик бэлэмнэммиттэр. Манна төрөппүттэрбит, сахабыт тылын учууталлара, кылаас салайааччылара, эбии үөрэхтээһин педагогтара – бары түмсэннэр олоҥхону сүрдээх үчүгэйдик туруорбуттар диэн сыаналыыбын. Быйылгы үөрэх дьылыгар гимназияҕа саҥа кэлбит 5-с кылаастарбыт бэйэ-бэйэлэрин кытта доҕордоһон, иллээх-эйэлээх сыһыаҥҥа олоҥхону үөрэтэн, ылынан, киһи итэҕэйэр курдук дьиҥнээхтик дьоҥҥо-сэргэҕэ тиэртилэр. Олоҥхо диэн норуот муудараһа. Аан дойдуга ЮНЕСКО-ҕа норуот духуобунай шедеврин быһыытынан билиниллибит айымньыбытын оҕолорбут сэҥээрэн ааҕан, ис сүрэхтэриттэн ылынан, бэлэмнэнэн сыанаҕа өссө көрдөрүөхтэрэ диэн эрэллээхпин. Олоҥхоҕо кинилэр бары өттүнэн сайдаллар: өй-санаа, тутта-хапта сылдьыы, сиэр-майгы, тыл-өс. Оҕолорбут өссө да сайда, түмсэ турдуннар, түмсүүлээх, бэйэ-бэйэлэригэр күүс-көмө, тирэх буоллуннар.
Оксана Степановна Данилова, дириэктэри иитэр үлэҕэ солбуйааччы:
– Бүгүн биһиэхэ дьоһун тэрээһин буолан ааста. Ол курдук гимназиябытыгар «Мөҥүрүүр бөҕө» диэн олоҥхо турда. Бу 5-с кылаастар бэйэлэрин бырайыактара буолар. Манна чуолаан кылаас салайааччылара, саха тылын учууталлара Сардаана Николаевна Гоголева, Фекла Николаевна Болдовская, Кыдана Михайловна Екечьямова дьаныардаахтык үлэлэстилэр. Биһиэхэ үөрэх дьыла саҕаланыаҕыттан хас биирдии кылаас бэйэтэ туспа бырайыактаах буолуохтаах диэн үлэ барар. Киһи үөрүөх иһин гимназияҕа саҥа киирбит 5-с кылаастарбыт олоҥхо тула түмсэн, олоҥхо туруордулар. Оҕолорбут бу тэтимнэрин ыһыктыбакка, салгыы өссө үлэлиэхтэрэ, бырайыактарын сайыннарыахтара диэн эрэнэбин. Бүгүҥҥү тэрээһинтэн олус астынан тураммын төрөппүттэри, оҕолору, учууталлары эҕэрдэлиибин.
Дьэ бу курдук үөрэхтэн, үлэттэн ордон олоҥхо ураты эйгэтин тэрийбит учууталларбытыгар, кырачаан доҕотторбутугар махтанабыт.
Наина БОЖЕДОНОВА, Айаана КУПРИЯНОВА, Айыына КУО, VI кылаас,
«Тумус кыһа» медиа-киин, С.К. Макаров аатынан Чурапчы гимназията