Олунньу 5-6 күннэригэр Горнай улууһун нэһилиэктэринэн кэрийэ сылдьан, Саха өрөспүүбүлүкэтин Бырабыытыластыбата ааспыт сыл түмүгүнэн отчуотун билиһиннэрдэ. Бырабыытыластыба бэрэссэдээтэлин солбуйааччы Ольга Валерьевна Балабкина салалталаах халыҥ хамаанда өрөспүүбүлүкэбитигэр туох үлэлэр ыытыллыбыттарын билиһиннэрдэ, ону тэҥэ нэһилиэнньэни кытта биирдиилээн көрүстүлэр, мустубут дьон кыһалҕаларын иһиттилэр, ыйытыктарыгар хоруйдаатылар.
Бэрдьигэстээх нэһилиэгэр мунньах олунньу 6 күнүгэр Мэхээлэ Дьөгүөрэп аатынан Сынньалаҥ киинигэр ыытылынна. Саалаҕа тобус-толору дьон муһунна. Мунньаҕы улууспут баһылыга Никита Викторович Андреев салайан ыытта уонна отчуот чилиэттэрин кытта билиһиннэрдэ. Ол курдук, сүрүн мунньаҕы Ольга Валерьевна Балабкина салайда. Мунньахха Култуура уонна духуобунай сайдыы миниистирэ Афанасий Иванович Ноев, Үөрэх уонна билим миниистирин солбуйааччы Ньургун Михайлович Павлов, СӨ Гражданскай оборонаҕа миниистирин бастакы солбуйааччы Айаал Ануфриевич Вензель, Тыа хаһаайыстыбатын министиэристибэтин мелиорация, сири уонна үүнээйини кытта үлэ департаменын салайааччыта Вячеслав Владимирович Гаврильев, Экономика министиэристибэтин структурнай уларыйыылар департаменын салайааччыта Татьяна Афанасьевна Максимова, Үлэ уонна социальнай сайдыы министиэристибэтин департаменын салайааччытын солбуйааччы Лана Григорьевна Петрова, Доруобуйа харыстабылын министиэристибэтин хаачыстыба хонтуруолун департамена Дьулустан Анатольевич Чичахов уонна да атыттар кэлбиттэр.
Ольга Валерьевна Аҕа дойдуну көмүскээччилэр сылыгар анал байыаннай дьайыы кыттыылаахтарыгар уонна кинилэр дьиэ кэргэттэригэр, элбэх оҕолоох дьиэ кэргэттэргэ, дьиэ-уот, коммунаалынай хаһаайыстыба, оҕо харыстабылыгар, үөрэх, доруобуйа, экономика уонна экология хайысхаларыгар туох сүҥкэн үлэлэр ыытыллыбыттарын сырдатта, күөх экраҥҥа инфографика быһыытынан барыта көстө турара эбии кэрэхсэбиллээх этэ.
Отчуот кэннэ нэһилиэнньэттэн ыйытыктар киирбиттэрэ. Ол курдук, А.Н. Осипов аатынан Бэрдьигэстээх орто оскуолатын дириэктэрэ Анжелика Альбертовна Гаврильева маннык көрдөстө:
Оскуолабыт ситиһиитэ үгүс. Үөрэнээччилэрбит, учууталларбыт оскуолабыт аатын өрөспүүбүлүкэ, Арассыыйа таһымыгар ааттаталлара улахан үлэттэн тахсар. Биһиги оскуолабыт дьиэтэ эмиэ биһиги ситиһиилэрбитигэр эппиэттиирэ буоллар диэн баҕа санаалаахпыт. Биһиги оскуолабыт дьиэтэ 2009 сыллаахха тутуллубута, хомойуох иһин, билигин аныгы олох усулуобуйатыгар эппиэттээбэт, хапытаалынай өрөмүөн үлэтэ ыытыллара буоллар диэн көрдөһөбүт. В.В. Филиппов аатынан Бэрдьигэстээх улуустааҕы гимназиятыгар эдэр үлэһиттэрбит элбээтилэр, ол эрэн дьиэбит туруга хаарбах. Билиҥҥи туругунан, биһиги гимназиябыт С.П. Данилов аатынан Бэрдьигэстээх орто оскуолатын урукку дьиэтигэр көһөн үлэтин-хамнаһын ыыта сылдьар. Эдэр учууталларбыт салгыы үлэлииллэригэр, сайдалларыгар туһааннаах усулуобуйа баара буоллар диэн Бырабыытыластыбаттан көмө көрдүүбүт. Саҥа дьиэтэ тутуллуо дуо?
Бэрдьигэстээх нэһилиэгин дьокутааттара гаас холботторууга субсидия харчыта индексацияланыа, гаас киллэттэрбит ыалга сыллааҕы көрүү-истии төлөбүрэ кыбаартал аайы төлөнөр курдук быһаарыллыа дуо диэн ыйыттылар. Иккис боппуруоска Ольга Валерьевна, ити көрдөһүүнү ылыныахпытын сөп, туһааннаах дьоҥҥо тиэрдиэм диэн хоруйдаата.
Ол курдук, ытык кырдьаҕас Евдокия Тарасова демография, доруобуйа харыстабылыгар бэйэлэрин көрүүлэрин эттэ. Бэтэрээн учуутал Александра Саввична Борисова босхо эминэн хааччыйыахтаах “Сахафармация” тэрилтэтин туһунан ыйытта. Рецепт суруттарбыт дьон эмптэрин кэмигэр кыайан ылбаттарын эттэ. “Хаарбах туруктаах дьиэлэртэн көһөрүү” федеральнай бырагыраама инникитин хайдах үлэлиирин чопчуластылар.
С.П. Данилов аатынан Бэрдьигэстээх орто оскуолатын төрөппүттэрин кэмитиэтин бэрэссэдээтэлэ Люция Ивановна Яковлева төрөппүттэр ааттарыттан толору сыл үлэлиир стационарнай лааҕыр тутуллуутугар баҕа санаалааҕын биллэрдэ.
Эдэр ыччат улууспутугар саҥа, толору хааччыллыылаах Ыччат киинэ тутулларыгар быйылгы сылга үп-харчы көрүллүө дуо диэн ыйытта. Онуоха Ольга Валерьевна: «2027 сылга быһаарыллыан сөп», — диэн эппиэттээтэ.
18 саастарын туолан Ийэ дойду иннигэр Ытык иэстэрин төлүү барбыт уолаттарга байыаннай чаастарыгар АБДь-га баралларыгар хантыраакка илии баттата сатыылларын туһунан кэпсээтилэр. Ольга Валерьевна итинник боппуруостары быһаччы хонтуруолга тута сылдьар. Итинник түгэннэргэ байыаннай прокуратура кытаанах үлэни ыытарын эттэ.
Онон мустубут дьон бары ыйытыктарыгар толору эппиэт ылла диэн сыаналыыбыт уонна салгыы Саха тыйаатырын уонна Олоҥхо тыйаатырын артыыстарын кэнсиэрин дуоһуйа көрө хаалбыта.
Сиһилии:
Кирилл Иванов, 9 «в» кылаас үөрэнээччитэ, Виктория Петровна Колодезникова, иитии үлэҕэ сүбэһит, С.П.Данилов аатынан Бэрдьигэстээх орто оскуолатын «Сайдам» медиакиинэ.