Ахсынньы 9 күнүгэр Арассыыйаҕа Аҕа дойду Дьоруойдарын бэлиэтиир күн. Бу күн чэрчитинэн биһиги гимназиябытыгар “Өйдүүбүт, киэн туттабыт” диэн стендэ арыллыытын сиэрэ-туома буолла.
Стендэ өрөспүүбүлүкэбит чулуу уолаттарын, гимназиябыт выпускниктарын, хорсун буойуттар Николай Николаевич Макаров уонна Айал Иванович Чичигинаров бэриниилээх буолуу, хорсун быһыы, героизм холобура буолалларын бэлиэтээн, сырдык кэриэстэригэр аналлаах.
МАКАРОВ НИКОЛАЙ НИКОЛАЕВИЧ
- Төрөөбүтэ: 1993 сыл от ыйын 11 күнэ, Чурапча с.
- Бүтэрбитэ: С.К. Макаров аатынан Чурапча гимназията, 2010 с.
- Туһаайыы: 2025 сыл от ыйын 16 күнүгэр, Сумскай уобалас Журавка дэриэбинэтин босхолуур кыргыһыы толоонугар геройдуу охтубута.
- Олоҕун кэрдиис кэмэ: Чурапча орто оскуолатыгар С.А. Новгородов аатынан оҕо тэрилтэтин «Сардаана» лиидерэ этэ, Киинэ премия лауреата буолбута. Гимназияҕа үөрэнэр кэмигэр волейболга, баскетболга, футболга, туризмҥа улуус чаҕылхай хамаандатыгар киирэрэ, олимпиадаларга, «Инникигэ хаамыы» научнай-практическай конференцияларга ситиһиилээхтик кыттара, спорт өттүгэр улуус чөмпүйүөнэ буолара. Эт-хаан өттүнэн сайдыылаах, үлэһит, оҥорбутун тиһэҕэр тириэрдэр, лидер дьоҕурдаах эдэр киһи этэ. М.К. Аммосов аатынан Хотугулуу-Илиҥҥи федеральнай универститеты бүтэрэн, плиточник-облицовщик уонна электромонтажник идэлэри баһылаабыта. 2015-2016 сс. армияҕа Т-72Б танк механик хамандыырынан, наводчигынан уонна операторынан сулууспалаабыта. 2017-2021 сс. Чурапча улууһун тутуу, архитектура уонна эксплуатация биир кэлим заказчигынан үлэлээбитэ, кини үлэлиир сылыгар социальнай суолталаах улахан объектары, ол иһигэр Килэнкигэ суол, Улахан Күөл оскуола-саада тутуллубута. 2021-2022 сс. Мирнэй улууһун «Саҥа» совхоһугар сүрүн инженер-тутуунан үлэлээбитэ. 2022 с. балаҕан ыйын 26 күнүгэр СВО-ҕа мобилизацияламмыта. Позывнойа — «Хонда». Десантнай минометнай взвод минометнай отделениетын командирынан Херсон, Бахмут уонна Курскай уобалас кыргыһыыларыгар кыттыбыта. Хорсун быһыыларын иһин икки төгүллээн наҕараадаламмыта. 2025 сыл от ыйын 16 күнүгэр, Сумскай уобалас Журавка дэриэбинэтин босхолуур кыргыһыы толоонугар геройдуу охтубута.
ЧИЧИГИНАРОВ АЙАЛ ИВАНОВИЧ
- Төрөөбүтэ: 1989 сыл ахсынньы 3 күнэ, Чурапча с.
- Бүтэрбитэ: С.К. Макаров аатынан Чурапча гимназията, 2007 с. (гуманитарнай кылаас).
- Туһаайыы: 2025 сыл муус устар 4 күнүгэр туруоруллут соругу толоруу кэмигэр кыргыһыы толоонугар геройдуу охтубута.
- Олоҕун кэрдиис кэмэ: Гимназияҕа үөрэнэ сылдьар кэмигэр «Билии – күүс» научнай конференцияҕа кыттан, бириистээх миэстэлэргэ тиксэрэ. Сылын аайы ыытыллар «Туйгун Уолан» гимназистар күрэхтэрин «Талант» номинациятын кыайылааҕа. Шахматка, мас-тардыһыыга, сүүрүүгэ, футболга көхтөөхтүк кыттара. Ылыммыт дьыалатын тиһэҕэр тириэрдэр, эппиэтинэстээх этэ. 2012 с. М.К. Аммосов аатынан Хотугулуу-Илиҥҥи федеральнай универститетка юридическай колледж «Правоохранительнай деятельноһын» бүтэрэн, юрист идэтин баһылаабыта. 2012-2013 сс. аармыйаҕа сулууспалаабыта, механик-водитель уонна радиостанция электригынан (Р-149 БМРГ) үлэлээбитэ. 2014-2015 сс. Таатта улууһун суутун приставынан үлэлээбитэ, III класстаах «Юрист» чиинин ылбыта. 2016-2018 сс. Чурапча улууһун администрациятыгар юриһынан үлэлээбитэ . 2019-2024 сс. Чурапча улууһун Муниципальнай имущество салайыытын комитетын специалиһынан, бэрэссэдээтэли солбуйааччынан үтүө суобастаахтык үлэлээбитэ. 2024 сыл ыам ыйын 14 күнүгэр Петропавловск-Камчаткай куоракка 40-с анал гвардейскай Краснодарскай-Харбинскай икки төгүл Краснай Знамялаах байыаннай чааһыгар (в/ч 10103) ыҥырыллыбыта. СВО кэмигэр кыргыһыыларга кыттан, хорсуннук сэриилэһэн, 2025 сыллаахха муус устар 4 күнүгэр геройдуу охтубута, хорсунун иһин наҕараадаламмыта.
Стендэни Чурапчы гимназиятын дириэктэрэ Ю.М. Слепцов, кылаас салайааччылара Мария Дмитриевна Колесова уонна Ирина Саввична Соловьева арыйдылар.
Салгыы «Дьоһуннааҕы кэпсэтии» уруок буолла. «Дьоһуннааҕы кэпсэтиигэ» уолаттар чугас аймах-билэ дьоно, доҕотторо, учууталлара, кэллиэгэлэрэ ахтыы оҥордулар. Үүнэр көлүөнэҕэ элбэҕи толкуйдатар кэпсэтии буолла. Биһиги биир дойдулаахтарбыт дьоннорун-сэргэлэрин, дойдуларын туһугар үлэлээн-хамсаан, көхтөөх олоҕу талан сылдьыбыттарын киэн тутта, сөҕө иһиттибит. Онон кинилэр үтүө ааттара үйэлэргэ умнуллубатын туһугар маннык көрсүһүүлэри, тэрээһиннэри ыытар билиҥҥи үйэҕэ олус наадалаах дии санаатыбыт.
Гимназия хорсун майгылаах, эр санаалаах, туохтан да толлубат күүстээх эрчимнээх выпускниктарынан киэн туттар. Оскуолабытыгар турбут “Өйдүүбүт, киэн туттабын” диэн стендэ эр санаа, дойдуга бэриниилээх буолуу, албан аат өйдөбүнньүгэ буолуо диэн эрэнэбит.
С.К. Макаров аатынан Чурапчы гимназиятын медиа-киинин юнкордара