Илья Егорович Винокуров аатынан Намнааҕы педагогическай колледжка художественнай-графическай отделение 60 сыллаах үбүлүөйүн үрдүк таһымнаахтык бэлиэтээтибит. Бу күн үөрэнэн, үлэлээн ааспыт выпускниктарбыт, бэтэрээн үлэһиттэрбит уонна бииргэ үлэлээн ааспыт коллегалар мустан, художественнай-графическай отделение 1, 2, 3 куурсун оҕолоругар бэйэлэрин туһунан билиһиннэрдилэр.
Ярослав Владиславович Касьянов Намнааҕы педагогическай колледж 2008 сыллаах выпускнига. Билигин «Саха» НКИК-ҕа режиссер-туруорааччынан үлэлиир.
– Мин кыра эрдэхпиттэн киинэ устуутунан дьарыктаныахпын баҕарар этим. Бэйэм кыахпынан уонна колледж көмөтүнэн, ол баҕабын толорон, үлэлии сылдьабын диэн этиэххэ сөп. Соторутааҕыта тахсыбыт «Айкуо» сахалыы киинэни устубуппут. Бу киинэҕэ биһиги устудьуон оҕолор олохторун көрдөрбүппүт. Элбэх оҕону көрөн, барсыан сөптөөх оҕолору талан үөрэтэн уһулбуппут. Оҕолор бастаан кыбысталлар, онтон кэлин үөрэнэллэр. Киинэ устар диэн уустук үлэ. Көрдөххө, судургу курдук. Онтон ис дьиҥэр киирдэххэ, сүрдээх ирдэбиллээх, эппиэтинэстээх үлэ буолар. Киинэ устарга тулуурдаах уонна бириэмэни сөпкө тутуһар буолуохха наада. Киинэҕэ саамай сүрүнэ – сценарий. Киһи киинэҕэ уһулла сылдьан толорор оруолун иһигэр киирэн, итэҕэтиилээхтик уобараска киирэн толороро ирдэнэр. Баҕалаах оҕо баар буоллаҕына, киинэ хайдах уһулларын көрдөрөн, бэйэҕит эмиэ киинэҕэ холонон көрүөххүтүн сөп. Мин онно эһигини өйүөҕүм. Билиҥҥи үйэҕэ киинэ устуутун үлэтигэр баҕалаах уонна дьоҕурдаах эрэ дьон киирэр, – диэн Я.В. Касьянов оҕолорго киинэ устуутун туһунан кэпсээтэ.
Прасковья Ильинична Прокопьева (Стручкова) кылтан өрүүгэ норуот маастара. Намнааҕы педучилище художественнай-графическай отделениетын 1983 сыллаахха бүтэрбитэ.
– Биһиги эргэ уопсайга олорон үөрэммиппит. Саҥа училищеҕа үөрэммэтэхпит эрээри онно үөрэммиппит. ИЗО учуутала буолар диэн киһи олоҕор олус туһалаах. Араас киэргэтиигэ, уруһуйга наадалаах. Манна эһиги кэрэҕэ, үчүгэйгэ үөрэнэн хаалын. Билиҥҥи үйэҕэ араас көрүҥ барыта баар. Быыстапкаларга кыттан иһин. Учууталларгытыгар убаастабыллаахтык сыһыаннаһын. Киһи тус бэйэтин олоҕун оҥосторугар, дьиэ-уот тэринэригэр кэрэни кэрэхсиирэ олус туһалыыр. Бэйэҕит дьоҕургутунан, сатабылгытынан иннигит диэки эрэллээхтик хардыылаан баран иһин, – диэн оҕолорго бэйэтин санаатын тиэртэ.
Нарыйа Ивановна Исакова, Розалия Михайловна Афанасьева училище 2008 сыллаах выпускниктар, ИЗО, черчение учууталын идэтин баһылаабыттара. Нарыйа Ивановна Сунтаар, Розалия Михайловна Кэбээйи улуустарыттан сылдьаллар. Иккиэн бииргэ үөрэммиттэр. Дарья Лаврична Соловьева салайааччылаах үөрэхтэрин бүтэрэн, атын-атын сирдэргэ үлэлии киирбиттэр. Кэлин Нарыйа Ивановна дизайнер, эбии үөрэхтээһин педагога буолбут. Онтон Розалия Михайловна кэргэнин дойдутугар психолог идэтигэр үлэлии барбыт. Кэлин бииргэ үөрэммит дьон 2016 сыллаахха Дьокуускайга эбии үөрэхтээһин тэрилтэтигэр көрсө түспүттэр, иккиэн логопед-учуутал идэтигэр бииргэ үөрэммиттэр. Билигин кинилэр баспытааталынан, социальнай педагогунан үлэлии сылдьаллар.
– Ити курдук ИЗО учууталыттан саҕалаан, сихолог, педагог, баспытаатал, социальнай педагог идэтигэр үөрэммиппит. Онтон үс сыл аннараа өттүгэр иккиэн логопедическай кэбиниэт арынан, иккиэн бииргэ үлэлии сылдьабыт. Педколледжы бүтэрбит буолан, матырыйаалларбытын барытын бэйэбит оҥорон, оҕолору дорҕоонноохтук саҥарарга диагностикалыыбыт, массажтыыбыт, сайыннарабыт. Сайынын оҕолорго лааҕыр тэрийэбит, маастар кылаас ыытабыт, мелкай моторикаларын сайыннарабыт. Өйдөрө-санаалара, тылларын саппааһа эбиллэр. Билигин санаатахха, тапталлаах колледжпыт көмөтө олус улахан. Биһиги манна идэлээх дьон буолан, билигин үлэлии-хамсыы сылдьабыт, – диэн кэпсээтилэр.
Кинилэр учууталлара Дарья Лаврична Соловьева үөрэппит оҕолорун туһунан ахтан-санаан ааста.
Наталья Дмитриевна Гуляева 1997 сыллаахха Дарья Лаврична, Ирина Степановна, Лариса Ефимовна буолан, эмиэ биһиги курдук манна бииргэ үөрэммиттэр.
– Мин училищены бүтэрэн баран, 7 сыл учууталлаабытым. Ол кэнниттэн атын сиргэ эмиэ үөрэхтээһиҥҥэ үлэбээбитим. ИЗО, черчение учууталынан, онтон эбии үөрэхтээһин педагогунан буолбутум. Биһиги саамай үчүгэй идэлээх дьоммут. Мин үйэм тухары уруһуй учууталынан сылдьыбытым. Эһиги эмиэ кэлин уопутуран, кэлин педагог, режиссер буолуоххутун сөп. Айар үлэ диэн оннук күүстээх. Онон бары устудьуоннарга үөрэххитин бүтэрэн, салгыы үрдэтинэргитигэр баҕарабыт, – диэн эттэ устудьуоннарга анаан.
Колледжпытыгар буолан ааспыт тэрээһин өрөспүүбүлүкэтээҕи таһымнаах буолан, үлэ уопутун тарҕатыы туһунан сертификаты уонна устудьуоннар оҥорбут чуорааннарын туттардылар.
Бүгүҥҥү тэрээһин ырыа-тойук, үҥкүү-битии, үөрүү-көтүү аргыстаах, сибэкки дьөрбөтө бэлэхтээх түмүктэннэ.
Эрчим НИКОЛАЕВ, И.Е. Винокуров аатынан
Намнааҕы педколледж I куурсун устудьуона,
«STUDLAND» медиа-киин юнкора