Сэтинньи 11 күнүгэр Кустуур орто оскуолатыгар История нэдиэлэтин чэрчитинэн нэһилиэкпит бэтэрээннэрэ Татьяна Афанасьевна Сыроватская, Наталья Константиновна Горохова, Мария Иннокентьевна Саргина «Бэтэрээнниин көрсүһүү» тэрээһин ытык-мааны ыалдьыттара буолан үөрэнээччилэргэ пионер, комсомол диэн өйдөбүлү бэйэлэрин оҕо, эдэр саастарыттан кэпсээн интириэһи тартылар. Олус истиҥ, иһирэх көрсүһүү буолан ааста.
Комсомол үгүс дьон кулгааҕар сылаастык иһиллэр тыл уонна өйдөбүл буолар. Билигин Комсомол диэн суох да буоллар, история уруогар элбэхтэ үөрэтэн, ааҕан-суруйан ааһабыт. Онон хас биирдии үөрэнээччи октябренок, пионер, комсомол диэн өйдөбүлү хайаан даҕаны өйдүөхтээх.
История нэдиэлэтин чэрчитинэн элбэх тэрээһин буолла. Ол туһунан биһиэхэ сиһилии Кустуур орто оскуолатын история уонна тулалыыр эйгэни үөрэтээһин (обществознание) учуутала Арыйаан Николаевич Иванов иһитиннэрдэ:
— История нэдиэлэтэ ааспыт үйэ саҕаланыытын уонна Улуу Өктөөп революциятын тиэмэлэригэр олоҕуран ыытылынна. Аһаҕас уруок «Улуу Өктөөп революцията» 8 кылаастарга ааста, нэһилиэк бэтэрээннэрин кытта көрсүһүү буолла. Маны таһынан, орто сүһүөх үөрэнээччилэригэр төрөөбүт дойдубут историятыттан викториналар, Улуу Кыайыы 80 cылын чэрчитинэн уруһуй күрэҕэ ыытылынна. Нэдиэлэ түмүгэр бу тиэмэлэргэ олоҕуран кылаастарынан ырыа, хоһоон, буолан ааспыт кэмнэри көрдөрүү күрэҕэ буолан ааста. Сыала-соруга хас биирдии үөрэнээччигэ Улуу Өктөөп революциятын суолтатын тиэрдии, турукка киллэрии, история предметин суолтатын оҕоҕо өйдөтүү-үөрэтии, патриотическай өйү-санааны, төрөөбүт дойдуга тапталы, дойдуга бэриниилээх буоларга иитэн таһаарыы.
История нэдиэлэтэ икки араас көлүөнэни сомоҕолоон уонна ситимнээн, оскуола олоҕо күөстүү оргуйа түстэ, үөрэнээччилэр уруок кэмигэр эрэ буолбакка, эбии үөрэхтээһин өттүнэн дойдубут историятын билэр уонна үөрэтэр кыахтаннылар.
Наум Наумов,
Кустуур орто оскуолатын 11 кылааһын үөрэнээччитэ, «Биракчаан» медиа-киин эдкора.
keskil14.ru