Тыа хаһаайыстыбата өбүгэ саҕаттан саха дьонун төрүт дьарыга буолар. Байаҕантай нэhилиэгэр кэтэх хаһаайыстыбалаах ыаллартан биирдэстэрэ – Петровтар дьиэ кэргэттэрэ.
Биһиги бүгүн үлэһит ыал тутаах киһитин, кинилэр уолларын Баатыры кытта кэпсэтэбит.
Баатыр элбэх оҕолоох Агафья Федоровна, Михаил Михайлович дьиэ кэргэттэригэр саамай кыралара буолар. Кини икки эдьиийдээх. М.Н. Готовцев аатынан Танда орто оскуолатын IX кылааһыгар үөрэнэр. Баатыры кыра эрдэҕиттэн от-мас, муус үлэтигэр, сүөһү иитиитигэр, тиэхиньикэ оҥоруутугар аҕата үөрэппит. Оскуола кэнниттэн медицинэ өттүнэн туттарсыан баҕарар.
Баатыр оскуолатыгар үөрэнэрин таһынан хаһаайыстыбатын үлэтигэр эппиэтинэһи сүгэр.
– Үөрэҕим таһынан хотоммор от бэлэмнээн, саах таһааран көмөлөһөбүн. Ону таһынан дьиэ тас үлэтэ элбэх. Өр хамнаммакка эрэ сатаан олорбоппун. Тугу эрэ гыннахпына табыллар. Сайын ийэм дойдутугар Мэҥэ Алдаҥҥа убайдаахпар тиийэн, мас хайытан көмөлөспүтүм, – диэн Баатыр кэпсэтиибитин саҕалаата.
– Батыр ынах ыырга 5-с кылааска үөрэммитэ. Сарсыарда аайы 6 чааска туран эдьиийинээн 16 ынаҕы ыан, үүттэрин астаан, ньирэйдэрин аһаталлара. Былырыын аҕабыт ыалдьан билигин улахан үлэни барытын Баатыр бэйэтэ оҥорор. Сайын оттоһор. Тиэхиньикэни бэйэтэ көрүнэр, – диэн ийэтэ Агафья Федоровна кэпсиир.
– Баатыр, эн санааҕар, билиҥҥи кэмҥэ сүөһү ииттэр ордук дуу эбэтэр атыылаһан олорор дуу?
– Билиҥҥи кэмҥэ, толкуйдаан көрдөххө, ынах иитэр быдан үчүгэй. Тоҕо диэтэххэ, билигин ас-эт сыаната олус үрдээтэ. Бэйэбит сүөһү ииттэн сибиэһэй эт, үүт, сүөгэй сиэн абыранабыт.
– Эһиги хотоҥҥут атын хотоннордооҕор ураты тутуулаах дии?
– Оннук. 2014 сыллаахха туппуттара. Истиэнэлэрэ салапаан.
– Быйыл төһө сүөһүнү кыстататаары тураҕытый?
– Уопсайа 40-чэ төбөнү кыстатаары олоробут. Онон үлэбит элбэх.
Бу курдук кэпсэтиибитин түмүктээтибит. Баатырга улахан махтал! Үөрэххэр, үлэҕэр үрдүк ситиһиилэри баҕарабыт.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Хаартыскалар дьиэ кэргэн архыыбыттан