«Бэлэм буол» — «Кэскил» оҕо сааспытын кытта ситимниир арахсыбат ааҕар аргыспыт.Мин маҥнайгы бэлиэтээһиним 1988 сыл ахсынньы ый 20 күнүгэр 101 нүөмэрдээх «Бэлэм буол» хаһыакка тахсыбыт. Ороһу орто оскуолатын 3 кылааһын үөрэнээччитэ Уля Антонова 9 саастаах кыыс бэйэтин бииргэ үөрэнэр сулусчааннарын, октябреноктарын туһунан сонун суруйан ыыппыт. Ол түгэнтэн номную 38 сыл ааспыт.
Биһиги урукку кэм оҕолоро Аан дойдуга, дойдубутугар туох буола турарын, сонуннары «Бэлэм буол» хаһыаттан. Ол иһин нэдиэлэҕэ иккитэ тахсар хаһыаты өрүү күүтэрбит, кылаас чааһыгар доргуччу ааҕарбыт.
Саманта Смит, Кубаны кытта доҕордоһуу, онтон да атын бастыҥ сонуннар биһиги октябренок, пионер санааларбытын бөҕөргөтөллөрө — «Бэлэм буол» биһиэхэ сир түннүгүн курдук буолара. Телевизор сонуннара улахан дьоннорго аналлаах курдуга уонна нууччалыы этилэр. Биһиэхэ бэйэбит төрөөбүт тылбытынан тахсар оҕо хаһыата буолан ааҕарга судургу эбит.Ону сэргии бэйэбит эмиэ ситиһиилэрбитин, сонуннарбытын суруйан ыытарбыт.
1990-1992 сс. Ороһу нэһилиэгэр тэриллибит «Уйан сүрэхтэр», билиҥҥитэ «Иэйиэхситтэр» бөлөх командира этим. Бу оҕо бөлөҕүн биһиги бары убаастыыр, опыттаах педагог, дэгиттэр салайааччы Нина Никитична Михайлова көҕүлээн тэрийбитэ. Күн бүгүҥҥэ дылы үлэлиир, оҕолору түмэн сылдьар. Былырыын, 2025 сылга, бөлөх 35 сылын бэлиэтээбиппит.
Бу бөлөх маҥнайгы хараҥаччыта буолан «Бэлэм буол» хаһыат 1991 с. «Амарах сүрэх» күрэх биллэрбитигэр биһиги Ороһу оҕолорун «Уйан сүрэх» бөлөҕө сыл устата үлэлээн, ол туһунан элбэхтэ хаһыакка сырдатан республика үрдүнэн кыайыылаах аатын сүгэн «Артек» лааҕырга 2 путевка бэлэх туппуппут. Мин уонна Сережа Туралысов Советскай союз, Аан дойду бастыҥ лааҕырыгар сынньанан, Хара муораҕа сөтүөлээн, араас дойду оҕолорун кытта доҕордоһон, элбэх саҥаны билэн кэлбиппит. «Артекка» сылдьыбыппытын туһунан тута «Бэлэм буол» хаһыакка суруйан ыыппыппыт.Бииргэ төрөөбүт балтым Акулина «Саахымат» диэн балаһаны сөбүлээн, онно баар сорудахтары толорон ыытааччы. «Бэлэм буол» хайҕабыл суругун тутан турардаах.Ол кэм оҕолоро бары сөбүлүүр балаһабыт «Суруйсуох, доҕордоһуох» — оҕолору кытта адрес атастаһан суруйсан билсэр этибит.
Ахтан санаан аастахха, оҕо саас олус элбэх үөрүүлээх түгэннэрэ «Бэлэм буол» хаһыаты кытта ситимнээхтэр.Ытыктыыр хаһыаппын үйэлээх үбүлүөйүнэн эҕэрдэлиибин, өссө да уһун сылларга оҕо аймах ааҕар, сэргиир уонна күүтэр хаһыата буолуҥ, редакция үлэһиттэригэр айымньылаах үлэни баҕаран туран истиҥ эҕэрдэбин тиэрдэбин!
Ульяна Лугинова,
СӨ экономикатын министерствотын туйгуна,
СӨ тыа хаһаайыстыбатын туйгуна,
Үөһээ Бүлүү Ороһу нэһилиэгин бочуоттаах олохтооҕо