Куруук доруобай буоларга улахан оруолу сөпкө аһааһын ылар. Биһиги аһыыр аспыт биэрэр эрчимэ күннээҕи хамсаныыбытыгар сөп түбэhиэхтээх. Төһө элбэҕи аһыыгын даҕаны соччонон элбэҕи хамсаныахтааххын.
Ас биологическай сыаннаһыгар битэмииннэр араас көрүҥнэрэ уонна минеральнай эттиктэр бааллар. Балар оҕуруот аһыгар, фрукталарга, үрүҥ аска дэлэйдэр. Оҕо доруобуйата чөл буоларыгар оскуолабытыгар үгүс ситимнээх үлэ тэриллэр, спорт да, өй-санаа да өттүнэн араас интэриэһинэй тэрээһиннэр ыытыллаллар. Доруобуйабытын бөҕөргөтөргө оскуолабыт медигэ М.В. Дмитриева, психолога А.И Сотникова уонна минньигэс астаах повардарбыт М.И. Лыткина, М.В. Игнатьева, Т.Е. Маркова, М.В. Семенов, Т.А. Григорьева, С.И. Ушницкая, М.Г. Пермякова ис сүрэхтэриттэн кыһаллаллар. Киһи тото-хана аһаатаҕына, үөрэнэргэ, эбии дьарыктанарга күүс-сэниэ эбинэр. Онон, асчыттар биһигини күҥҥэ иккитэ битэмииннээх итии аһылыгынан хааччыйаллар. Оскуолабыт остолобуойун минньигэс аһын бары олус сөбүлүүбүт. Нэдиэлэтээҕи аспытыгар эттээх миин, борщ, хаппыысталаах, хортуоппуйдаах соркуой, кууруссалаах, кэтилиэттээх лапса, рис, гречка, оҕуруот аһа, фрукта, үрүҥ ас, бурдук ас, морс, кисель уо.д.а. киирэллэр.
Сайын оскуолабыт иһинэн «Сатал» оҕо сынньанар уонна чэбдигирэр лааҕыра үлэлиир. Манна үөрэнэбит, оонньуубут, экскурсияларга сылдьабыт, элбэх саҥаны билэбит. Биллэн турар, манна эмиэ минньигэс астаах повардарбыт биһигини олус үчүгэйдик аһаталлар. Ону таһынан, «Эврика» каникуллааҕы оскуолаҕа биһиэхэ доруобуйаҕа туһалаах ас туһунан кэпсэтиилэри, иҥэмтэлээх аһы астаан маастар кылаастары ыыталлар.
Бэйэ оҕуруотун аһа доруобуйаҕа олус туһалаах уонна иҥэмтэлээх. Онон, сайын оҕуруот аһын дэлэччи олордон, тиһигин быспакка сиир наадалаах. Үгэскэ кубулуйбут «Көмүс күһүн бэлэхтэрэ» куонкуруска куруук көхтөөхтүк кыттабыт. Биһиги кылаас оҕолоро, төрөппүттэрэ араас бүлүүдэни астаан, тууһаммыт тэллэйтэн, лечоттан саҕалаан, барыанньаҕа, бурдук ас арааһыгар тиийэ аҕалан, айылҕа бэлэхтэринэн композиция оҥорон куруук миэстэлэһээччибит.
Оскуолабытыгар былырыыҥҥы үөрэх дьылыттан кыргыттарга аналлаах «Кыыс Куо» бырайыак үлэҕэ киирбитэ. Сыала-соруга – кыыс оҕоҕо кыра эрдэҕиттэн иистэнэргэ, ас астыырга сатабылы иҥэрии, кэрэ куону нарын, сэмэй, көнө майгылаах, чэбэр буола дьулуһарыгар уһуйуу. Бу бырайыак чэрчитинэн остолобуой үлэһиттэрин салайыыларынан саха норуотун национальнай бүлүүдэлэрин астыыбыт.
Сыллата «Ворлдскилс» күрэх ыытыллар. Манна «Кондитерское дело» салааҕа биһиги оскуолабыт оҕолоро ситиһиилээхтик кытталлар. Эриэккэс рецептэринэн араас бүлүүдэлэри астыыллар, остуол киэргэтиитин оҥороллор.
Ону таһынан, биһиги оскуолабыт асчыттара Саранск куоракка ыытыллыбыт Бүтүн Арассыыйатааҕы «Лучшая школьная столовая» курэххэ кыттан, лауреат үрдүк аатын сүкпүттэрэ. Биһиги оскуолабыт асчыттарынан киэн туттабыт. Кинилэр баар буоланнар, оҕолор тото-хана аһаан, күннээҕи үөрэхпитигэр күүс-сэниэ эбинэбит.
Ити курдук, оскуолабытыгар оҕо доруобуйатыгар, иҥэмтэлээх аһы аһыырыгар улахан болҕомто ууруллар. Түгэнинэн туһанан минньигэс астаах асчыттарбытыгар дириҥ махталбытын тиэрдэбит.
Лилиана Попова, 10 б кылаас үөрэнээччитэ,
«Түмэн» медиа-киин эдкора,
Ф.Г. Охлопков аатынан Майа орто оскуолата.
keskil14.ru