Дьокуускайга Бырабыыталыстыба 2 №-дээх дьиэтин аактабай саалатыгар Арассыыйаҕа эбии үөрэхтээһин педагогтарын күнүгэр анаммыт үөрүүлээх мунньах буолан ааста. Тэрээһиҥҥэ өрөспүүбүлүкэ эбии үөрэхтээһинин педагогтара, методистар, тренердэр, наставниктар, бэтэрээннэр, министиэристибэлэр бирэстэбиитэллэрэ кыттыыны ыллылар.
Күн бүгүн Өрөспүүбүлүкэ үрдүнэн 5-18 саастаах оҕолортон 144 тыһыынчата эбии үөрэхтээһини ылар. Ити − 5-18 саастаах оҕо уопсай ахсааныттан 71,77%. Эбии үөрэхтээһиҥҥэ 6773 тыһ. педагог үлэлиир.
Кэлиҥҥи үс сылга оҕо эбии үөрэхтээһини ылара 19,6%-нан улааппыт. Ордук техническэй хайысхалаах эбии үөрэххэ интэриэс үрдээбит: 25527 оҕоттон 28132 буолбут. Оҕо уонна ыччат талаанын, дьоҕурун таба көрөн сайыннарарга, өйүүргэ ураты болҕомто ууруллар. 2025 сыл түмүгүнэн бу хайысхаҕа үлэ түмүгүнэн Саха сирэ регионнар ортолоругар иккис миэстэни ылары ситиспит.
Саха сирин үөрэнээччилэрэ дойду таһымнаах күрэхтэргэ, бэстибээллэргэ өрөспүүбүлүкэ чиэһин үрдүк таһымҥа көмүскүүллэр. Ол курдук, быйыл ыытыллыбыт “Наследники традиций” бүтүн Арассыыйатааҕы оҕо бэстибээлин кыайыылаахтарынан Попов Алгыс (Мэҥэ Хаҥалас), Старостина Милана (Эбээн-Бытантай) уонна Федоров Артемий (Хаҥалас) буолбуттар.
Бу туһунан мунньах сүрүн дакылаатын оҥорбут СӨ үөрэххэ уонна билимҥэ миниистирэ Нюргуна Соколова иһитиннэрдэ. Кини күн бүгүн эбии үөрэхтээһиҥҥэ айымньылаахтык үлэлии сылдьар педагогтарга истиҥ эҕэрдэтин, бэтэрээннэргэ махтал тылларын эттэ.
Тэрээһин сүрүн түһүмэҕинэн өрөспүүбүлүкэ эбии үөрэхтээһинин үлэһиттэрин чиэстээһин буолла. Ол курдук, култуура, спорт, экологическай уонна байыаннай-патриотическай иитии, техническэй уонна цифровой хайысхаларга эбии үөрэхтээһин үлэһиттэрэ Арассыыйа үөрэҕин министиэристэбин, СӨ бырабыыталыстыбатын, министиэристибэлэр наҕараадаларынан, махтал суруктарынан бэлиэтэннилэр.
Итиэннэ 2025-2026 үөрэх дьылыгар эбии үөрэхтээһин муниципальнай тирэх кииннэрин рейтинин түмүгүн биллэрдилэр. Кыайыылааҕынан Бүлүү улууһун Н. И. Протопопова аатынан “Кэскил” киин ааттанна. “Новые смыслы дополнительного образования” анал ааты Хаҥалас улууһун “Хаҥалас” эбии үөрэхтээһин киинэ, “Прорыв года” ааты — Анаабыр улууһун эбии үөрэхтээһини киинэ ыллылар, ону таһынан методическэй үлэҕэ үрдүк көрдөрүүлэрин иһин Мииринэй куорат киинэ бэлиэтэннэ.
Өрөспүүбүлүкэбитигэр эбии үөрэхтээһин биир бэлиэ бырайыагынан “Будущий дипломат” өрөспүүбүлүкэтээҕи күрэх буолар. Быйылгы күрэх муҥутуур кыайыылааҕа Сунтаар политехническэй лиссиэйин 11 кылааһын үөрэнээччитэ Федот Алексеев буолбут. Өссө биир сүрүн хайысханан спорт уонна физическэй култуура буолар: Ил Дархан көҕүлээһининэн ыытыллар “Спортивные якутяне” спартакиадаҕа быйыл 70 тыһ. эдэр спортсмен кыттыыны ылбыт.
Эбии үөрэхтээһин хайысхатын сайдыыта 2030 сылга диэри оҕо эбии үөрэхтээһинин сайдыытын Концепциятын 2-с түһүмэҕин чэрчитинэн салҕанан барар. Салгыы хас биирдии оҕо эбии үөрэхтээһини ылар кыаҕын кэҥэтии, бырагыраамалары саҥардыы, биэдэмистибэлэр хардарыта үлэлэһиилэрин хааччыйыы соруга турар.
Санаттахха, Арассыыйаҕа эбии үөрэхтээһин педагогтарын күнэ 2018 сылтан дойду бэрэсидьиэнин уурааҕынан сыллата алтынньы 8 күнүгэр бэлиэтэнэр.
Алексей БОРИСОВ
Кэскил14.ру