Ньурба улууһун Таркаайы нэһилиэгин аҕа баһылыгын солбуйааччытынан иккис ыйын үлэлиир Евгений Матвеевич Юмшановы кытары К.Д. Уткин аатынан Марха орто оскуолатын «Уткин сонуннара» медиакиин эдэр кэрэспэдьиэннэрэ көрсүстүлэр. Кыстыкка бэлэмнэнии, быйылгы от сезонун түмүгүн уонна да атын тутаах тиэмэлэргэ ыйытыылары биэрэн кэпсэттилэр.
— Үтүө күнүнэн, Евгений Матвеевич! Бүгүн биһиги, К.Д. Уткин аатынан Марха орто оскуолатын «Уткин сонуннара» медиа-киин юнкордара, эһигини кытары кэпсэтэ кэллибит. Халлаан тымныйан, кырыа кыһыммыт чугаһаан иһэр. Биһиги нэһилиэкпитигэр кыстыкка бэлэмнэнии хайдах бара турарый?
— Үтүө күнүнэн, оҕолор, оскуола үөрэнээччилэрэ, эдэр кэрэспэдьиэннэр! Мин эһиги баһылыккыт Михаил Михаилович Гаврильев солбуйааччыта буолабын. Саҥа кэлэн үлэлии сылдьабын, үлэлээбитим иккис ыйа бүтэн эрэр. Ыйыппыт боппуруоскутугар эппиэттиир буоллахха, кыстыкка киириибит, бастатан туран, объектарбытын ититииттэн саҕаламмыта. Ол курдук, ООО «Арыылаах» тэрилтэ үлэһиттэрин уонна нэһилиэк комиссиятын кытта ититии систиэмэтин бэрэбиэркэлээн баран, балаҕан ыйын саҥатыгар холбоммута, билигин үчүгэйдик үлэлии турар.
Хайа баҕарар нэһилиэккэ биир саамай тутаах хайысха — сылгы-сүөһү иитиитэ буолар. Ол иһин элбэх сылгыны-ынаҕы иитэр туһугар элбэх от оттонуохтаах. Биһиги быйыл нэһилиэкпитигэр оттооһун бэккэ ааста. Улууспут баһылыга Иннокентий Михайлович иһитиннэрбитинэн, улуус үрдүнэн оттооһун эмиэ ситиһиилээхтик түмүктэммит. Онон бу кыстыкка киириигэ оттооһун түмүгүнэн бэлэммит дии саныыбыт.
Ол эрээри сорох ыал ититии систиэмэтигэр холбоммокко, тус бэйэлэрэ оһоҕунан уонна электричество уотунан сылытынан олороллор. Онон нэһилиэкпит дьонун-сэргэтин күүһүн холбоон кыаммат ыалларга, соҕотох ийэлэргэ уонна анал байыаннай дьайыыга сылдьар ыччаттардаах дьиэ кэргэттэргэ маһынан-мууһунан көмөлөһүөхпүт. Кэлэр нэдиэлэттэн муус үлэтэ саҕаланыаҕа, муус үлэтэ туспа бэйэтэ бырааһынньык курдук буолар. Онон кыстыкка киириигэ бэлэммит диэн санан олоробут.
— Нэһилиэкпитигэр дьиэ-уот, саҥа тутуулар тустарынан сырдатыаххыт дуо?
— Нэһилиэкпитигэр дьиэ-уот тутуутун туһунан этэр буоллахха, саҥа дьиэ туттан биир эдэр ыал дьиэлэригэр киирдилэр. Ону таһынан, бэйэбит дьаһалтабыт специалиһа эмиэ дьиэтин тутуутун бүтэрэн, бу күһүн киирэрдии бэлэм олорор.
Салгыы Евгений Матвеевиһы кытары интервьюну видеоҕа көрөргүтүгэр ыҥырабыт:
Кэпсэттэ Александр Федоров, Марха орто оскуолатын 11 кылааһын үөрэнээччитэ.
Видеоны уһулла Эрик Данилов, Марха орто оскуолатын 11 кылааһын үөрэнээччитэ.
Видеону таҥна Александр Федоров.
К.Д. Уткин аатынан Марха орто оскуолатын «Уткин сонуннара» медиа-киин эдкордара.
keskil14.ru