Нэһилиэккэ кыстыкка бэлэмнэнии, олох-дьаһах уонна кэлэр сыл былаанын билсэ Маар орто оскуолатын иһинэн үлэлиир «Юла» медиакиин эдкордара Ньурба улууһун «Түмүк нэһилиэгэ» ТСТ баһылыгын Егоров Дмитрий Николаевичтыын кэпсэттилэр.
Кылгас ыспыраапка:
Түмүк нэһилиэгэ. Ньурба улууһун нэһилиэгэ, киинэ Маар.
Улуус кииниттэн 48 км илин диэки сытар.
Нэһилиэнньэтин ахсаана — 761 киһи.
— Дмитрий Николаевич, биһиги нэһилиэкпитигэр кыстыкка бэлэмнэнии хайдах бара турарый?
— Биһиги нэһилиэкпитигэр кыстыкка бэлэмнэнии үлэтэ былаан быһыытынан ыытылынна, ол курдук сылааһы биэрии өртүгэр «Арыылаах» ХЭТ уонна ОдьКХ хочуолунайдарыгар өрөмүөн үлэтэ ыытылынна, маны сэргэ ОдьКХ киин хочуолунайга биир саҥа оһох кэлэн 100% ититиини биэрэ тураллар.
— Быйыл оттоооһун хампаанньата хайдах тэриллэн ааста? Быйыл дьон оттуур сирдэрэ ууга барбыта биллэр, кыстыыр отторун булуннулар дуо?
— Биһиги нэһилиэкпит географическай балаһыанньата уустуктардаах уонна угут дьыл туран, сирбит 80% оттоммото, онон нэһилиэнньэ кэккэ ыарахаттары көрүстэ. Билиҥҥи туругунан атын нэһилиэктэргэ баран оттоон уонна от атыылаһан, дьон кыстыкка киирдилэр.
— Билиҥҥи туругунан нэһилиэнньэбит ахсаана төһөнүй? Оҕо төрөөһүнэ, эдэр ыччат олохсуйуута биһиги нэһилиэккэ хайдаҕый?
— Бүгүҥҥү туругунан нэһилиэнньэбит ахсаана 761 киһи, 0-17-гэр диэри 184 киһи, үлэлиир саастаах — 399 киһи, үлэлиир саастарын ааспыт — 195 киһи.
— Нэһилиэкпит тэрилтэлэригэр специалистарынан хааччыллыы хайдаҕый? Ханнык тэрилтэлэргэ идэлээх үлэһиттэр тиийбэттэрий? Саҥа специалистар кэллилэр дуо?
— Быйыл врачебнай амбулаториябытыгар саҥа быраас Чочанов Юлиан Семенович «Земскай доктор» бырагырааманан илии баттаһан 5 сылга үлэлии кэллэ. Маар орто оскуолатыгар икки эдэр учуутал — Семенов Егор Петрович физкультура уонна Матвеева Лира Николаевна алын кылаас учууталлара кэлэн үлэлии сылдьаллар. Каадырынан хааччыллыы уопсайынан тыа сиригэр, өрөспүүбүлүкэ да үрдүнэн кэккэ ыарахаттардаах, ол курдук биһиэхэ син-биир учууталларбыт тиийбэттэр. Биир кыһалҕа — нэһилиэктэн эдэр ыччат көһөн барыыта үгүс, нэһилиэнньэбит элбии турар диэбэт балаһыанньата буолан турар.
— Дмитрий Николаевич, кэлэр 2026 с. үлэ былаанын туһунан кылгастык сырдатыаҥ дуо?
— Кэлэр сылларга биһиги сүрүн сорукпут — кэлэр 2027 сылга Ньурба улууһугар Саха сирин норуоттарын IX Спортивнай оонньууларыгар бэлэмнэнии. Быйылгыттан уонна эһиилги сыллаах үс сыллаах үлэбит (трехлеткабыт) — нэһилиэкпит тас көрүҥүн тупсарыы үлэтэ бара турара. Эһиилгиттэн күүстээх ыраастаныы үлэлэрэ күүтэр уонна араас таһымнаах федеральнай, өрөспүүбүлүкэтээҕи граннарга кыттаммыт нэһилиэкпитин тупсаҕай көстүүлээх, киһи олохсуйарыгар сөптөөх усулуобуйалаах буоларыгар күүспүтүн уурабыт.
Сиһилии видеоҕа көрөргүтүгэр ыҥырабыт:
Кэпсэттэ корреспондент Уйгууна АФАНАСЬЕВА, уһулла, таҥна оператор Виталий ФЕДОРОВ.
«Юла» медиакиин, Маар орто оскуолата, Ньурба улууһа.
keskil14.ru