Биһиги, Дүллүкү орто оскуолатын 5 кылаас үөрэнээччилэрэ «Мэхээлэчээн булчут кэпсээннэрин» аахтыбыт уонна бэйэбит санаабытын үллэстэбит.
Вика Кычкина , V кылаас, Дүллүкү орто оскуолата, Үөһээ Бүлүү:
Биһиги кылааһынан саха суруйааччыта Тимофей Егорович Сметанин оҕолорго анаан суруйбут «Мэхээлэчээн булчут кэпсээннэрэ» кинигэтин аахтыбыт.
«Этэрбэс чаархаан буолбута» кэпсээни сөбүлээтим. Мэхээлэчээн балтын аһынан сиргэ илдьэ барар. Аҕатын этэрбэһинэн кырынааһы бултаан булугас өйдөөҕүн көрдөрдө. Өссө Мэхээлэчээн олус хорсун уол эбит. Ойуур иһигэр оҕо ытыырын истибитим буоллар, мин куттанан төттөрү сүүрүөм этэ. Оттон кини билээри-көрөөрү салгыы бара турбут. Оҕо эрээри, күн аайы кэриэтэ бултуур. Бу кэпсээннэр киһини күллэрэллэр уонна толкуйдуурга үөрэтэллэр. Дүллүкүгэ » Кыталык» диэн киинэ көрдөрөр саала баар. Киинэ кэллэҕинэ, хайаан да баран көрүөм дии санаатым.
Биһиги бииргэ үөрэнэр доҕорбут Сема Тобохов кыра эрдэҕиттэн аҕатын кытта булка сылдьар. Кини Мэхээлэчээн туһунан кэпсээннэри болҕойон иһиттэ, аахта. Онтон оҕолорго бэйэтин мүччүргэннээх сырыыларыттан кэпсээтэ. Сема элбэхтэ тыаҕа сылдьар буолан, булт туһунан билэрэ-көрөрө элбэх. Киинэ хаһан улахан экраҥҥа көстөрүн кылаас оҕолоро бары күүтэбит.
Cема Тобохов, V кылаас:
— Мин Мэхээлэчээн курдук бултуурбун олус сөбүлүүбүн. Арай биирдэ арҕаа тыаҕа туһах ииппитим. Онтон туһахпын көрө барбыппар куобах сытар этэ. Арааһа, өлбүт диэн араарбытым куобаҕым эмискэ туран сүүрэн хаалбыта, от иһигэр куота турбута. Онон, аан бастаан тыыннааҕын суоҕун бэрэбиэркэлиэххэ дии и санаабытым. Киинэтин эбэһээт көрүөҕүм.
Илья Степанов, V кылаас:
— «Эһэни мииммитим» кэпсээни сөбүлээн аахтым. Мэхээлэчээн хорсун, эһэ арҕаһыгар олорсор, куттаммат уол . Түргэн, тыаҕа сатаан сылдьар. Уолаттаар, Мэхээлэчээн курдук хорсун, мындыр буолуоҕуҥ.
Эдуарда Докторова, V кылаас:
— Мэхээлэчээн хорсун эрээри, мэник-тэник уол диэн өйдөөтүм. Адьырҕа кыылтан — эһэттэн куттаммат, тугу гынарын түргэнник толкуйдуур. Киинэҕэ Мэхээлэчээни ким оонньуурун билиэхпин баҕарабын. Хара баттахтаах, мэник, үөрбүт-көппүт дьүһүннээх эрээри, хорсун оҕо буолуо дии саныыбын.